Frosinone lakah Napoli an mualpho

Serie A champion lai Napoli chu Coppa Italia last 16 aṭangin an tla, an hneh loh hi anmahni aia team nem leh rinkai lo zawk Frosinone niin mualneitu Naples club hi 4-0 ngawtin an mualpho.

Inkhel dangah Fiorentina chuan penalty shooutout hmangin Parma 4-1 in an hneh. Lazio chuan minute ngana leka Matteo Guendouzi goal hmangin Genoa chu 1-0 a hnehin an tlang ve bawk.

Napoli coach Walter Mazzarri-a'n a player ṭha ṭhenkhat chu a dahṭha ngei mai. Mahse, an inkhelhna hi Diogo Maradona Stadium a nih avangin Napoli hi rinkai zawk an ni tho, amaherawhchu beisei ang ngawtin thil a thleng lo ta a ni.

Hun chanve hma lamin goal a lut lo a, second half-ah Frosinone tan Enzo Barrenechea, Giuseppe Caso, Walid Cheddira leh Addou Harroui ten goal khat ṭheuh an khung, quarterfinal an inpetkai zawk ta daih.

Napoli coach Walter Mazzarri chuan, "Player ṭha khel lo an tam a, bench aṭanga an luh hnuah pawh danglamna erawh a awm thei ta chuang lo. Min ṭantute chungah ngaihdam ka dil, inkhel en tur satliah ni loin kan chak lai hmuh tuma lo kal khawm an nia.

"Mahse, an duh leh beisei ang result kan neihsak thei ta si lo. Kan tihsual hi siamṭhat kan tum dawn a, a bik takin goal kan chhuahna laite kan ennawn ang a, a phui lo lai kan hnawhkhat nghal tur a ni ang," a ti.

Italian champion hian kumin chhungin Serie A match khelh tur pahnih an la nei. Inrinni zanah Jose Mourinho enkawl AS Roma an lenchilh dawn a, chumi hnuah Monza an la mikhual leh bawk ang.