Hyderabad vs Jamshedpur - tu zawk nge tho dawn?

Nizan lamah Indian Super League inkhel a awm lo a, zanin dar 8:00-ah Hyderabad leh Jamshedpur an intawng dawn thung. Team pahnih hi ISL table mawng lama awm an ni a, a chak lo zawk zawk chu table mawngphahah an awm ang!

Men of Steel (Jamshedpur sawina) hian match 10 an khelh tawhah vawi khat chiah hnehna la changin, vawi thum draw an nei a, vawi ruk an tlawm - team 12 inelna ISL-ah 11-na an ni mek a, an hnuaia awm chu zanina an lenchilh tur Hyderabad a ni.

Manipur coach Thangboi Singto enkawl Hyderabad hian match 10 an khelh tawhah chak an la nei miah lo a, tun season ISL-a chak la nei lo awmchhun an ni - vawi ruk tlawmin, vawi li draw an nei thung. Zaninah team pahnih hi table mawngphaha awm duh loin an innuai dawn a, a hmuhnawm ang.

Hyderabad hian midfielder Mark Zothanpuia, Lalchhanhima Sailo leh forward Ramhlunchhunga te an kawl a, Jamshedpur hian defender PC Laldinpuia leh tawnhriat nei ṭha Ricky Lallawmawma te an kawl thung.