Wolves mikhual tur Chelsea

Zanin dar 11:30 hian Molineux Stadium-ah Wolverhampton Wanderers leh Chelsea te an inkhel dawn. Wolves hian kartawpah Aston Villa an hneh lo a, champion rinkai ni pha Chelsea-in Everton an hneh bik lo.

London club hian Toffees laka point an hlawhchhuah loh avangin table-ah panganaah an tla thla a, Frank Lampard-a'n champion rinkai an nih loh thu a sawi bawk.

Chutihrualin vawi khat chetsual vangin Blues hi an chhe ta thut tihna an ni lo a, Everton an hneh loh hma hian league-ah match kua chhung hneh loh an tawng lo. 

Lampard-a hote hian insiam-ṭhat nghal an tum dawn a, amaherawhchu Hakim Ziyech leh Callum Hudson-Odoi te hliam vangin an la chhawr thei dawn lo. Toffees laka khel lo Christian Pulisic-a dinhmun a la chiang lo bawk.

London club hian tlarhmaah Timo Werner, Mason Mount, Kai Havertz, Tammy Abraham leh Olivier Giroud te kawl mah se Premier League-a goal khung thei bik player an nei lo. League-a goal khung tam ber German forward Werner-a'n goal li chauh a khung a, defender Kurt Zouma nen an khung zat a inang.

Kum 34 mi Giroud-a'n league-ah goal khat chauh a la khung mah se French forward hian vawi khat chauh bul a ṭan avangin dem theih a ni lo. Pound maktaduai 71 man Havertz pawh beisei anga chet ṭhat loh avangin manager-in a chhan a ngai tawh.

Lampard chuan, "Havertz hian tlarhma pathumah a khel thei vek a, Chelsea tana a khelh hma pawhin vawi tam tak heng position pathumah hian a khel tawh. Player naupang a ni a, Premier League game a ran bawk avangin dawhthei taka kan thlir a ṭul. Kai Havertz hian theihna sang tak a nei a ni," tiin a sawi.

Blues ai maha nasain Wolves-in insiamṭhat an mamawh. Nuno Espirito Santo hote hian match 12 an khelh aṭangin vawi nga an chak a, hetiang zat bawk hi an chak lo. Portuguese player tamna club hian Liverpool hnena an hralh Diogo Jota hmunruak luah khat thei an nei lo a, harsatna belhchhah turin Raul Jimenez a inhliam bawk.

Wolves-in pound maktaduai 35-in Fabio Silva an lalut a, Portuguese striker hi kum 18 mi chauh a nih avangin rinrawl atan a la tlak loh a, Premier League-ah goal a la khung lo a, Aston Villa nena goal ban a pet per chu a goal khung teuh ber a la ni.

Chelsea hian season liam ta khan Molineux Stadium-ah 5-2 in hnehna an chang a, Tammy Abraham-a'n hattrick a siam bakah an lamah a ti lut. Tun ṭumah pawh hian Lampard-a hote tan talbuai mek Wolves laka point thum hlawhchhuah loh chuan result chhia a ni ang.