Zanin dar 7:30-ah Zote Toyota MPL10 'Dream Final' : Chanmari FC Vs Mizoram Police FC

Zote Toyota MPL10 final-ah Chanmari FC leh Mizoram Police FC te an inhmachhawn dawn a, league round-a pakhatna leh pahnihna an nih avangin 'Dream Final' tia sawi theih a ni. Chanmari hian nomawi an chawi a nih chuan a lungthu kimna chiah tur a ni dawn a, Police tan erawh an nomawi hmasa ber tur a ni.

Police coach Lalbiaksanga Colney-in MPL5-ah Bethlehem Vengthlang FC final luh pui mah se Chanmari FC an hneh lo a, MPL-ah a la champion lo. Chanmari coach Laldampuia'n Aizawl FC leh Chhinga Veng FC te a champion pui tawh a, MPL10-a a champion thei a nih chuan player leh coach ni chunga champion hmasa ber a ni ang.

Chanmari ṭhat lai ber

Chanmari FC manager hi C. Lalthanmawia (Mawitea) a ni a, MPL4 leh MPL5-a an manager tho kha niin season thum manager a nih ṭumah final an lut vek. MPL4 final-ah Aizawl FC lakah an vanduai a, MPL5-ah an champion.

Mawitea chuan, "Team ṭha tak din kan tum a, season ṭantirh lamah kan duthusam team kan din thei lo. Kan duh ang player kan la lut thei lawk lo a, inhliam an awm bawk. Tunah hian kan dam kim a, final-a khel tur Chanmari hi kan duhthusam team a ni," tiin Vanglaini a hrilh.

Chanmari hian I Day Football-ah goalkeeper an nei ṭha tawk lo a, semifinal-ah Chhinga Veng an hneh lo. MPL-ah keeper Zothanmawia leh captain Lalrinchhana Tochhawng ten an rawn belh a, phase 2-ah Lalmawizuala a rawn chet ṭhat bawk avangin an tlarhnung a phui ta hle.

Police tan hun ṭha

Mizoram Police hi MPL hmasa bera champion tura rinkai an ni a, Police Meet vangin an champion ta lo. Aizawl FC-in I League an khelh ṭantirh khan Police hian an player ṭha F. Lalrinpuia leh Lalbiakhlua te loan hmangin an hawhtir a, MPL4-ah table mawngphahaha awmin an relegate phah hial.

Police hi MPL6-ah an rawn kir leh nghal a, recruitment thar an neih avangin team ṭha zingah an tel leh tawh. MPL-a sulhnu nei ṭha Malsawmfela, R. Malsawmtluanga, H. Lalbiakthanga, Lalrinzuala Khiangte, Lalbiakhlua (Hlutea) leh F. Lalmuanawma te bakah player engemaw zat an lak belh a, an squad a chhah leh ta hle.

Mahse, player ṭha ho hi an kum a upa ve tawh a, kumin hi an tan hun ṭha a ni. Tun season-ah civil player F. Lallawmkima leh F. Lalnuntluanga te squad tihchhah nan an lak belh a, an ṭangkaipui hle.

Coach Lalbiaksanga Colney hnuaiah an la champion ngai lohna All India Police Meet-ah an champion tawh a, tun season a vawi khat nan BS-a Colney hoin MPL champion an tum dawn a ni.