MPL10 Final - Inkhel en tinuamtu tur

Zanin dar 7:30 hian Zote Toyota MPL10 final chu RG Stadium-ah Chanmari FC leh Mizoram Police ten an khel dawn. Nomawi inchuhna hi RG Stadium-a en thei lo tan pawh Zonet Zawlbuk leh HD bakah Zonet YouTube channel-ah a en theih dawn a, inkhel en nawm nan team pahnih hi inbelchiang teh ang.

Muanawma Vs T. Mawia

Goalkeeper pahnih hi an ṭha ve ve a, tawnhriat pawh an ngah ve ve. Goal venhim hrim hrimah Muanawma a ṭha zawka ngaitu an awm thei ang a, tlarhnung aṭanga ball semah T. Mawia a ṭha zawka ngaitu an awm thei bawk ang.

T. Mawia hi MPL hmasa bera Dinthar champion puitu goalkeeper kha a ni a, Mohammedan leh Gokulam Kerala tan pawh khel tawhin MPL7-ah Chhinga Veng tan khelin best keeper-ah an thlang. Muanawma hi MPL best keeper ni lai a ni a, MPL6 khan Chanmari champion puiin best keeper a ni bawk.

Mapuia Vs Ahmuntea

Chanmari hian Santosh Trophy group stage-a top scorer Lalkhawpuimawia an kawl a, Mapuia hian goal nga a khung tawh. Kelkang pa hian goal a la khung tam tawk lo a ni thei a, chutihrualin Kolasib-a Aizawl FC an hneh ṭuma goal hmahruai a khung bakah semifinal-a Chawnpui an hneh ṭumin goal hmahruai a khung a, match pawimawhah goal a khung thei - final hi match pawimawh chu a ni.

Mapuia vengtu tur chu Police defender Ahmuntea a ni a, Hualngohmun pa hi Kelkang pa ang bawka tharum ngah leh sa ṭha a ni. A ṭha tawk tih nemnghettu chu Police-ah chauh ni loin Mizoram team-ah rinrawl a ni a, Ahmuntea'n Mapuia a veng tur hi en a châkawm hle.

Zozoa Vs Rinzuala

Season liam taa Chawnpui champion puitu Zozoa hi semifinal-ah a rawn nung thar a, a club hlui Chawnpuiin dan ngaihna an hre lo. Champhai Kanan tlangval dang theitu tur chu Mizoram tana a khelhpui Aizawl Venglai pa Lalrinzuala Khiangte a ni. Rinzuala hian a tawnhriat bakah a thiam dan ber tharum hmangin Zozoa dah ṭhat a tum ang.

Danmawia Vs Ruatpuia

MPL hmasa ber best player R. Laldanmawia hi dah hniam theih a ni lo a, match pawimawhah a danglamna a lang leh ṭhin. Sialhawk Express hian goal li a khung bakah dinglam aṭangin ball ṭha a dah lut nasa a, Police left back Lalruatpuia'n a ven uluk a ṭul ang. Final boruak sangah Ruatpuia theihna fiahin a awm dawn.

Sawmfela vs Rinchhana

Mizo striker ṭha an sawi apianga sawi tel ziah tawh tur Malsawmfela hi MPL-ah top scorer a la ni ngai lo a, mah se zanina a hmachhawn tur Chanmari FC hi MPL5 khan champion puiin best player leh best forward a ni a, MPL3-ah best forward a ni bawk. Sawmfela hi a kum a upat ve deuh tawh bakah a taksa rit ve deuh tawh mah se MPL club-a defender naupang zawkten ven harsa an ti thei hle. Zanin hian amah ang bawka tawnhriat nei ṭha Rinchhana Tochhawngin a veng dawn a, Rinchhana hian amah pui turin Ramngaihsanga a neih ang bawkin Sawmfela'n amah pui turin player thawkrim F. Lallawmkima a nei thung.

Biaktea/Fakzuala Vs Mampuia/Mawizuala

Mizoramin Santosh Trophy an champion hmasak ber ṭuma winger pawimawh pahnih Biaktea leh Fakzuala te Mizoram Police tan an la pawimawh reng a, mah se kum dang angin goal an khung tam tawh lo. Player pahnih hi MPL-ah ṭum hnih ve ve top scorer an ni thei a, kuminah erawh Fakzuala'n goal hnih chauh khungin Biaktea'n a la khung lo. Mahse, final-ah chuan player tawnhriat nei ṭha danglamna a lang ṭhin a, Nisapui tlangval Mawizuala leh Champhai Vengthlang tlangval Mampuia te tan fimkhur a ṭul ang. Mawizuala hian MPL bakah Mizoram team-ah tawnhriat a nei ṭha tawh a, Mampuia erawh Inter Village Football-ah Champhai Kanan champion pui mah se MPL boruak sang la tem lo a ni.

Midfield Battle

Mizoram Police hian midfield-ah BT-a leh MS-a te an hmang a, player pahnih hi an inhriatchian bakah tawnhriat an nei ṭha a, an kum erawh a upa ve tawh thung. BT-a leh MS-a thlawp tur hian forward Lawma a tawlh let ṭhin bawk.

Chanmari erawhin mifield an siksawi nasa ṭhin a; semifinal-a inlan Vena, Crespo leh AB-a te bawk final-ah an inlan a rinawm. Team pahnih midfielder-te ṭhat dan a inang lo a, thil hlui ngainatu tan chuan Police midfielder buk a rit zawk ang. Mahse, Chanmari midfielder hi a chhuak thar ṭha an tih ang chi kha an ni thung.

Bench lam hi

Police-in goal an mamawh a nih chuan bench aṭangin Talea, Hlutea, Tluangtea leh Ramthara te an luhtir thei a; midfield tichak turin Dawngtea a awm. Tlarhnungah Ahmuntea kawppui turin Dinpuia leh B. Sena te an awm a, a lut lo zawk hi bench tichaktu an ni thei ang. MPL1-a Dinthar champion puitu Lalthantluanga (Mama) pawh an la kawl.

Chanmari hian bench an nei ṭha zawk a tih theih! Tlarhmaah Apuia, Mapuia, Ruatmawia leh Vincent te an awm a, MPL club danga bul ṭan thei vek an ni. Midfield-ah Rosanga leh John te an awm a, tlarhnungah pawh Lalbawiha, Zohminga, Piana leh Hmingtea te an awm bawk.