MPL10 top scorer tur Rinzuala?

Zote Toyota MPL10 chu zaninah zawhfel a ni dawn a, thilmak a thleng a nih ngawt loh chuan Aizawl FC forward Lalrinzuala chu top scorer tura ngaih a ni. Serchhip tlangval Rinzuala hian MPL10-ah phase 1-ah match sarih khel vekin goal sarih a khung a, phase 2-ah I League vangin match hnihah chauh inlanin goal khat a khung belh a; match kua a inlan aṭangin goal riat a khung.

Rinzuala hnaihtu Electric Veng captain C. Lalhriatpuia leh Chhinga Veng captain MS Dawngliana ten match khelh tur an nei tawh lo a, final khel tur zinga Rinzuala hnaihtu chu Chanmari FC striker Lalkhawpuimawia leh Mizoram Police midfielder R. Malsawmtluanga te an ni a, goal nga ve ve an khung tawh. Kelkang pa Mapuia tan top scorer ni turin goal li a khung a ngai a, Police midfielder MS-a erawh hattrick a siam bakah minute 58 hmaa an thlak chuan top scorer a la ni thei bawk.

MPL-a top scorer ni tawhte chu tun ṭuma Chhingcows captain Dawngtea (MPL1), Police winger Lalbiakhlua (MPL2, MPL3), Aizawl FC foward F. Lalrinpuia (MPL4-ah hian Valpuia hi Police aṭangin loan hmangin Aizawl FC tan a khel), tun ṭuma Chanmari FC coach Laldampuia (MPL5), Police captain Lalfakzuala (MPL6, MPL7), tun season-a Chhinga Veng tana match khat inlan MC Malsawmzuala (MPL8, MPL9) te an ni a; MPL10-a player anga inlan tawh lo chu Valpuia leh Dampuia te chauh an ni.

MPL10-ah hian goal 162 a lut tawh a, official chuan goal 165 lut ang a ni thung. Hei hi a chhan chu round hmasa berah Chhinga Veng chu registration fel loh vangin 3-0 in an chaktir. Goal 162-ah hian own goal 10 a awm a, goal 152 dang hi player 93-in an khung.