Hun ṭha bawhpelh ka tum lo - Dampuia

Chanmari FC-in coach K. Malsawmkima pui turin an player hlui Laldampuia an la lut a, Kawrtethawveng pa Dampuia hian AFC C Licence nei tawhin MPL-ah tak tawnhriat la nei lo mah se khaw hrang hrangah team a enkawl tawh a, MPL10-ah champion ngei a tum.

December 1, Zirtawpniah Chanmariin Chawnpui 2-0 in an hneh lo a, phase 2-ah chak an la neih loh bawk avangin Mala banin Dampuia'n team enkawl hna a ṭan. Dampuia hnuaiah Electric Veng FC leh Venghnuai FC te a hneh ve ve a, match tawp berah player khel ngai lo deuh luhtirin Chhinga Veng lakah an chak lo.

League round-ah Chanmari hi pakhatna an ni a, Dampuia hote hian Mala hoa an hneh loh Chawnpui lakah phuba an la a, MPL10 semifinal-ah 3-0 ngawtin an chak. Dampuia chuan, "Player leh coach anga champion hmasa ber nih theihna hun ṭha ka nei a, bawhpelh ka tum lo. Police hian tawnhriat nei ṭha mah se an kum a upa ve tawh a, kan fitness a ṭha zawk dawn. Minute 90 chhunga chinfel kan duh a, penalty shootout thleng a nih avangin penalty erawh kan zir," tiin Vanglaini a hrilh.

Dampuia chuan Chanmari mipui bakah player leh coaching staff ṭhian ṭhate zawng zawng ṭawiawmna a ngen. MPL-ah Chanmariin huhang an ngah ṭhin a, kumin final-ah pawh entu an ṭhahnem khawp ang.