Liverpool-in Hammers an nuai!

League Cup semifinal khel turin Liverpool chuan quarterfinal-ah 5-1 in West Ham an sawp a, Ningani zan inkhelah hian Reds tan Curtis Jones chuan goal hnih khungin, Dominik Szoboszlai, Cody Gakpo leh Mohamed Salah ten goal khat ṭheuh an khung.

West Ham tan Jarrod Bowen chuan goal khat a khung ve a, mahse, Anfield-a goal an khung hian goal thum an lamah a lut tawh a, Hammers beiseina kai tho turin a tawk zo lo. Liverpool hian semifinal-ah Fulham an tawng dawn a, semifinal lehlamah Middlesbrough leh Chelsea an inkhel ang.

Liverpool-in nuamsa takin hnehna chang mah se, fan-ten thawm an chhuah ṭhat tawk loh avangin coach Jurgen Klopp erawh a lawm lo hle. German coach chuan, "First half-a kan khelh ṭhat em em lai khan, fans aṭangin thlawpna kan dawng ṭha tawk lo a, chu chuan min tilawm lo a ni.

"Fan-te hnena ka zawh duh chu hei hi a ni a, eng nge maw an duh chu ni le? Thil tam tak thlak danglamin, West Ham lakah inkhel kan thunun a, chance pawh kan hlah nual. Fans zingah khan awm ta ila, 1000% a ka sawi ngam chu, ka ṭhu mai mai miah lo ang tih hi a ni," a ti.

Liverpool hian Pathianni khan hmelma kumhlun Manchester United chu 0-0 in an inhnehtawkpui a, hemi ṭum pawh hian Gary Neville chuan, "Anfield-a thawm a zawih ber ṭum a ni hial ang. Liverpool fan-te hi ka fak fo ṭhin a, mahse, kum 60 emaw 70 hnua fans an tam ber ṭumin United nena an inkhela boruak an siam loh ber ṭum kan tawng," a ti.

United nena an inkhelah khan Reds hian Anfield Road Stand chu an hawng thar a, fans 57,000 zetin a hmunah inkhel an en theih phah - Hammers lakah pawh heti zat fans hi an pungkhawm a, mahse, player-te thlawp ṭhat avanga hming chher ṭhin Kop thawm a reh tlat.

Klopp chuan, "United lakah khan kan khel chhe lutuk a, kan sawp ta lo kha thupha kan chawi a ngai ta zawk mai em ni?" a ti a, Inrinni zan dar 11:00-ah league hmahruaitu ni tura an elpui Arsenal nen an inkhelh zui dawn avangin fans thlawpna a ngen zui.

Liverpool dinthar lehtu Klopp chuan, "Inrinni zanah Anfield thlawpna kan mamawh dawn. Arsenal chu kan inkhelh laiin an awl a, Gunners hrechiangtu chuan min hmachhawn turin an inbuatsaih nasa hle ang, tih an hrethiam ang.

"Chuvang chuan kan khingpui coach leh kei kan intihbuai kher ngai loin, second ṭantirh aṭanga min thlawp turin Anfield kan mamawh a ni. December-ah inkhel a tam mah mah, i tih a, inkhel en tura i inpeih lo a nih chuan i ticket chu midang pe mai rawh," a ti a, fans ho a phut na hle.