Champion lai Inter Milan an tla

Serie A hmahruaitu Inter Milan chuan Coppa Italia nomawi an kawl lai an humhim thei ta lo. Nilaini zan last 16 inkhelah extra time an khelh hnuin Inter hi Bologna lakah 2-1 a chak loin an zinkawng a tawp.

Simone Inzaghi naute hian goal khung theihna remchang an neih chu an hmang ṭangkai lo, season hmang ṭha tak Lautaro Martinez-a penalty pet chu Bologna keeper Federico Ravaglia chuan a lo dansak.

Hun pangngaiah goal a lut lo, extra time minute hnihnaah Inter defender Carlos Augusto chuan a tauh lut a, mahse, extra time second half-ah Sam Beukema leh Dan Ndoye ten goal hniha chhang letin quarterfinal an lut.

Inter hian tun hma chuan Bologna hi an ngam ṭhin hle, a bik takin Coppa Italia bikah chuan an intawn hnuhnung pariatah an hneh vek, mahse tunah chuan Serie A lama palina tan hun ṭha a inher chhuak ve ta.

Inter Milan coach Simone Inzaghi chuan, "A kum zawnin Coppa Italia nomawi kan chawi a, tun ṭumah pawh tlang turin hun ṭha kan nei. Kan chak lo hi a pawi a, eng vanga chak lo nge kan nih tih hi kan ennawn ang, a tawp lam minute 15 kan khelh dan kha a lungawi thlak loh," a ti.

An chak loh bakah striker ṭha Lautaro Martinez chu hun tawp dawn lamah malpui vei lam hliam vanga lak chhuah a ni a, Italian manager hian Argentina international dinhmun hi endik hmasak a ngaih tur thu a sawi bawk.

Last 16 inkhel hmasa lamah Italian champion Napoli chu Frosinone lakah an lo chak lo tawh bawk - Fiorentina leh Lazio ten quarterfinal an lut thung. Nakkum January 2, Thawhlehni zanah AC Milan leh Cagliari ten last 16 match hnuhnung ber an khel thung dawn a ni.