Piancham lawm nan goal hnih

Kylian Mbappe chuan a kum 25 tlin lawm nan goal hnih a khung a, a club Paris Saint Germain chu Metz lakah 3-1 in a chakpui - a nau Ethan Mbappe chuan PSG tana a match hmasa ber a khel ve bawk.

Nilaini zan Paris khawpuia inkhelah Vitinha chuan French champion tan goal hmahruai a khung a, a hnuah Mbappe chuan yard 20 a hla aṭanga khungin, mikhual lamin Matthieu Udol hmanga an chhanlet hnuah Mbappe bawkin a khung belh.

Kum 25 mi Mbappe hian PSG tan inelna hrang hrangah match 282 a khelh aṭangin goal 233 a khung tawh a, Ligue 1 champion tan hian goal khung tam ber niin, league nomawi vawi nga a chawipui tawh.

An chak dawn tih a chian hnuah Luis Enrique chuan kum 16 mi midfielder Ethan Mbappe chu inkhelhna hun a siamsak a, tun thla tawp lama kum 17 tling tur hian a club tana a match hmasa ber a khelh ni hi a hre reng tawh ang.

Enrique naute hian tun season Ligue 1 match 17 aṭanga point 40 hmuin hma an hruai a, anmahni hnaih bertu Nice aia point ngaa sang zawk chungin thlasik chawlh an hmang dawn tihna a ni.

France rama football inelna sang ber hi an chawl rih dawn a, thlasik chawlh an hman zawh hun nakkum January 12, Zirtawpni zanah an khel chhunzawm leh ang.