Forest manager thar Nuno

Premier League club Nottingham Forest chuan an manager thar atan Nuno Espirito Santo an la lut a, kum hnih leh a chanve daih inremna ziakin manager chhuak ta Steve Cooper hmun ruak a luah a ni.

Forest hian tun kartir lam khan Cooper-a an ban, kum hnih an thawhpui tawh manager hnuaiah hian season an hmang ṭha tawk lo - Premier League an match hnuhnung parukah vawi nga ngawt an tlawm, tlak hlauhawm zingah an awm mek.

Wolves leh Tottenham Hotspur manager hlui Nuno hi November thla khan Saudi Pro-League club Al-Ittihad chuan an manager aṭangin an lo ban ve thung a, hnathawh nei loa awm lai niin tunah chuan Forest tan hna a thawk ang.

Kum 49 mi Nuno hian a match hmasa ber atan Inrinni hian Premier League match khel turin Bournemouth an mikhual ang. Tun hmain Wolves leh Spurs tan EPL-ah sulhnu a lo neih tawh avangin a talbuai lo tura ngaih a ni.

Portuguese manager hian Championship aṭangin Wolves chu EPL-ah a kaipui a, English football inelna sang berah hian a zawnin vawi hnih chu pasarihna a nihpui a, Europa League hial khelhpuiin quarterfinal an thleng bawk.