Kane leh Bayern an kal zel

Bayern Munich tan Harry Kane chuan goal a khung chhunzawm zel - Bundesliga season kal laiah goal 21 khung tling tawhin VfL Wolfsburg lakah a team a chakpui.

England captain Kane leh Jamal Musiala te goal hmangin Bavarians hi 2-1 in an chak, mualneitu Wolfsburg tan Maximilian Arnold-a'n hla deuh tak aṭangin khung mah se awmzia a nei phak tawh lo.

Kum 30 mi Kane chuan, "Thlasik chawlh hman dan tur duhawm tak a ni. Munich khawpuiah Bayern tan hun rei lo tê ka hmang tawh a, a nuam ka ti hle. Kum tharah pawh hetiang boruak hi neih chhunzawm theih ka inbeisei," a ti.

Bundesliga season khata goal khung hnem ber chu Robert Lewandowski a ni a, kum 2020-21 season khan league match hmasa 15 aṭangin goal 20 a khung - Kane hian match 16 an khelh tawh chinah goal 21 a nei tawh.

Kane leh Bayern Munich che ṭha viau mah se tluk loh an nei! Xabi Alonso enkawl Bayer Leverkusen chuan Bochum 4-0 in an hneh a, Bayern aia point lia sang zawk chungin thlasik chawlh an hmang dawn a ni - match khatin an khel tam thung.

Leverkusen hi inelna hrang hrangah match 25 chhung chu tlawm loin an kaltluang ta. Spanish manager hian German team zingah tlawm loa kal tluang rei record a siam ta hial - season chawhnu lamah fiahna an hmachhawn zui ang.