Barcelona an chak hram

La Liga match hnih a zawna an chak zawh loh hnuah Barcelona an chak ve leh ta a, an mikhual Almería chu Nilaini zan khan 3-2 in an hneh. Mahse, an hneh tak Almeria hi La Liga table mawngphah luahtu an ni a, goal hnih an chhuah avangin insiamṭhat an la ngai hle tih a lang.

Barca tan captain Sergi Roberto chuan goal hnih khungin, Raphinha chuan goal khat a khung bawk - Catalan club hian vawi hnih ngawt hma an hruai hnuah Leo Baptistao leh Edgar Gonzalez hmangin Almeria hian si phurh an sut a, a tawpah erawh team ṭha zawk danglamna langin Roberto-a'n chak nemnghehna goal a khung.

Robert Lewandowski chuan goal khung theihna chance vawi tam nei mah se, a chhawr thei lo a, Polish striker hian inelna hrang hranga match a khelh hnuhnung 14-ah goal thum chiah a khung - Ilkay Gundogan chuan a chance neih a chhawr lo bawk.

Barca hian La Liga lamah chuan Krismas chawlh an hmang zui dawn a, January 4-ah Las Palmas nen an inkhel leh chauh ang. Mahse, vawiin zing dar 7:30 hian Mexican club Club America nen Dallas-ah friendly match an khel zui dawn.

Xavi enkawl team hian Almeria laka hnehna an chan avangin table-ah pathumna dinhmun an luah zui a, hmahruaitu Girona chu point rukin an phak lo mek - mahse, Girona hi nizan khan an inlan a, an chak chuan an inthlauhna hi a san belh ang.