Juventus chakna Ronaldo leh Dybala

Cristiano Ronaldo-a penalty vawi hnih leh Paulo Dybala goal hmangin Juventus chuan Genoa 3-1 in an hneh. Andrea Pirlo naute hian duhthusamin season hmang lo mah se Serie A nomawi humhim an la tum ngam zel.

Pathianni zan inkhel dangah hmahruaitu AC Milan chu Parma nen 2-2 in an inhnehtawk a, pahnihna Inter Milan erawhin Cagliari 3-1 in an luhchhuah thung. Milan club lian pahnih inthlahna hi point thum chauh a ni ta.

Juventus lamin inkhel thunun mah se goal an khung thei mai lo, goal hmasa ber nei turin an nghah rei a ngai. Minute 57-naah Dybala chuan Serie A season kal laia a goal hmasa ber khungin a team hma a hruai pui.

Goal luh aṭanga minute li hnu lekah mualneitu lamin Stefano Sturaro hmangin an sut a, chak tur a chiang lo. Mahse Juan Cuadrado leh Alvaro Morata te penalty hlawh chhuah chu Ronaldo-a'n khungin khualmualah point thum an hmu.

Old Lady forward Ronaldo chuan, "Barcelona hneh hlim kan nih avangin inrintawkna kan ngah, mahni goal ven thiam tak Genoa lakah pawh chu kan inrintawkna chuan nasa takin min pui. Kan goal khung apiang hi nomawi chawi theihna tura kalkawng pawimawh a ni bawk," a ti.

San Siro a inkhelah Milan an che fuh lo, mikhual Parma lamin Hernani leh Jasmin Kurtic te goal hmangin 2-0 in hma an hruai a, season bul ṭan fuh Milan chu chak lo tura ngaih an ni. Mahse, Theo Hernandez-a goal hnih hmanga sut lehin point khat an hlawh chhuak hram.

Milan hian coronavirus vangin Zlatan Ibrahimovic an chhawr thei lo a, hliam vangin Simon Kjaer leh Alexis Saelemaekers an khel thei lo bawk. Coach Stefano Pioli chuan a naute inpekna vanga point hlawh chhuak an nih thu a sawi.

Pioli chuan, "Parma khan counter attack aṭangin na takin min bei ṭhin a, inven pawh a harsa hle. Goal hnih kan chhuah hnuah pawh ka naute an tlawm duh lo a, huaisen taka an beih let tlat avanga point hmuh kan ni, khatiang rilru kha ka duhzawng a ni," a ti.

Inkhel dang

Antonio Conte kaihhruai Inter Milan-in Champions League lama beisei an phak loh hnuah result ṭha an nei ve leh a, Cagliari tana Riccardo Sottil goal khung chu Nicolo Barella, Danilo D’Ambrosio leh Romelu Lukaku te hmanga chhang letin hnehna an chang.

Inter manager Conte chuan, "Champions League vanga kan rilru na chuan Serie A lamah rah ṭha a chhuah zel ka beisei. Goal khung kawngah harsatna kan neih loh avangin kawng dik kan zawh tihna a ni," a ti. Conte naute hian Serie A match 11 aṭangin goal 29 an khung, anni aia khung hnem an awm lo.

Inkhel dangah champion tum ngam zinga mi Napoli chuan Sampdoria 2-1 in an hneh. Gennaro Gattuso naute hian point 23 an nei tawh a, champion lai Juve nen an inzat. An chungah hian Inter leh Milan chauh an awm avangin nomawi inchuh boruak a sang zel dawn.