Baggies an invawrh sang zel

Season thara Premier League khel turin West Bromwich Albion chuan kawng dik an zawh zel a, Pathianni zan khan Championship match-ah Millwall chu 2-0 a hnehin table chung berah an awm chhunzawm zel. 

Baggies hian hnehna an chan leh tak avangin match 31-ah point 59 an nei a, anmahni hnaihtu pahnih Leeds United leh Fulham aia an sanna chu point li a ni. 

Millwall khelmualah Filip Krovinovic chuan minute 42-naah goal hmahruai a khung a, Dara O'Shea chuan goal khat thawh belhin Baggies-in hnehna an chang.

Inrinni zan khan Baggies elpui ber Leeds United chuan 2-0 in Nottingham Forest an ngam lo a, West Brom an chak zui bawk si avangin an inkar hi point li laia tih zau a ni leh ta a ni. 

Forest hian hnehna an chan avangin point 54 an nei ve ta bawk a, hetihlai hian Fulham chu ngaihthah thiang lo zingah an tel ve leh ta bawk - Inrinni zan khan Blackburn Rovers chu 1-0 in an hneh. 

Season hmasa Premier League aṭanga Championship-a tla team tan hian Aleksandar Mitrovic chuan league-a a goal 20-na a khung - English top flight football-ah kir leh an tum ruh hle.