Santosh Trophy-a Mizoram tana player pawimawh tamna : Chanmari FC leh Mizoram Police FC

Zote Toyota MPL10 final chu zanin dar 7:30 hian RG Stadium, Mualpuiah khelh a ni dawn a, final-ah Chanmari FC leh Mizoram Police FC te an inhmachhawn ang. Santosh Trophy qualifying round-ah khan Chanmari leh Police te hian player pawimawh an thawh hnem a, hei hian final-a inhmachhawn tur team pahnih ṭhatzia a nemnghet.

Chanmari FC hian defender Lalrinchhana Tochhawng leh Lalmawizuala, midfielder Crespo Vanlalhriatpuia leh Lalthangliana te bakah forward Laltlanzova leh Lalkhawpuimawia (Mapuia) te an thawh. Mizoram Police-in player panga an thawh thung a; goalkeeper Lalmuanawma, defender Lalrinzuala Khiangte leh Lalhmunmawia (Ahmuntea) bakah midfielder H. Lalbiaktluanga leh R. Malsawmtluanga te an ni. Police player panga hi mimal lawmman dawng thei tur nominee-ah an lang vek!

Thlirletna

Mizoram hi group stage-ah Services, Uttarakhand, Pondicherry, Sikkim leh Dadra and Nagar Haveli and Daman and Diu te nen group khatan an awm a, inelna hi Amritsar, Punjab-ah khelh a ni. Match hmasa berah Services chu October 15, Pathianniah an hmachhawn a, 2-1 in an hneh lo. Mizoram tan Chanmari FC striker Mapuia'n siphurh sut mah se National Games-a gold medal la zui ta Services-in hnehna an chang ta lo.

October 17, Thawhlehniah Mizoramin DNHDD an hmachhawn leh a, 5-0 in an chak. Kelkang pa Mapuia'n goal li khungin Police midfielder H. Lalbiakthanga'n goal khat a khung ve bawk. October 19, Ninganiah Mizoramin Sikkim 1-0 in an hneh a, goal awmchhun hi Mapuia'n a khung.

October 22, Pathianniah Mizoramin Uttarakhand 1-0 bawkin an hneh a, goal awmchhun hi minute 65-naah Chanmari winger Laltlanzova goal khung a ni. October 24, Thawhlehniah Mizoramin match hnuhnung berah Pondicherry an hmachhawn a, 6-0 in an chak. Lalkhawpuimawia'n goal hmahruai a khung hnuah Chhinga Veng striker PC Lallawmkima'n hattrick a siam a, Chanmari striker Mapuia'n khung belh lehin hun tawpah Chanmari forward Zozoa'n a khung belh. Official-ah erawh Zozoa goal hi Lalrinchhana Tochhawng goal khung anga dah a ni thung.

Bihchiang ila

Mizoram hian match nga an khel a, match liah Police goalkeeper F. Lalmuanawma hman a ni. Services an hmachawn ṭumin defence laiah Rinchhana Tochhawng leh Ahmuntea te an inkawp a, Rinzuala chu right back-ah awmin left back-ah Chhinga Veng defender A. Vanlalremruata a awm. Remruata hi Chanmari defender Mawizuala'n a rawn thlak a, Nisapui tlangval hian first eleven a chang zui char char bawk.

Mizoram hian Services lakah goal hnih an chhuah a, a bak match liah goal an chhuah tawh lo. Mizoram tlarhnung innghahna chu Chanmari leh Police an ni a; Police player Muanawma, Ahmuntea leh Rinzuala bakah Chanmari leh Mizoram captain Rinchhana leh Mawizuala te chu khawih chet thiang lo ang hiala sawi theih a ni.

Midfield-ah Police midfielder BT-a'n minute zawng zawng a khel vek a, chutiang bawkin no. 9 hna chelhtu Mapuia'n minute zawng zawng khelin goal riat a khung bawk. Police midfielder MS-a chu hmun pawimawh chang pha tur ni a, damloh vangin DNHDD leh Sikkim-ah a khel thei lo. MS-a hi match hmasa bera Services hmachhawn ṭum leh match hnuhnung pahnih Uttarkhand leh Pondicherry an hmachhawn ṭumin player pawimawh a ni tho.

MPL10 semifinal-a man of the match Zozoa'n Santosh Trophy-ah a theihna tak a pho chhuak lo a, chutihrualin Uttrakhand laka goal awmchhun a khung chu a hlu hle. Sikkim lakah game plan vangin bench-ah a awm a, second half-ah Zozoa hi lutin Mapuia'n chakna goal a khung theihna chhan a ni.

Sialhawk tlangval Crespo-a'n DNHDD leh Pondicherry an hneh ṭumin bul a ṭan ve ve a, Services leh Uttarkhand lakah bench aṭangin a lut. Crespo hian a ball thiamna a lantir a, Pondicherry-a goal hmahruai Mapuia'n a khung theih nan a lalut ṭha takzet. Tlungvel tlangval AB hi match hmasa pathumah a inlan vek a, damloh vangin match hnuhnung pahnihah a khel lo. Mizoram senior team-a a vawi khat kalna a ni a, a theihna tak a lang chhuak lo.

Mizoram hian Santosh Trophy final round lut turin goal 14 an khung a, heng zinga goal 11 hi Police leh Chanmari player-te khung a ni. Kumin inelna hi FIFA Santosh Trophy tih a ni a, February – March 2024 hian Naharlagun, Arunachal Pradesh-ah final round hi khelh a ni ang.