Madras Test Ngaihnawm

Infiamna khawvel huangchhungah kum 1986 kha chu, Mizorama antenna herhchawpa a neinung deuhte sitting room chhuat chara nula tlangvalte’n Mexico khawpuia Diego Maradona'n World Cup nomawi a chawi kha kan mitthla thei mai awm e.

Hemi kum Mimkut thla vek hian captain Allan Border kaihhruai Australia team chuan India ram an rawn tlawh. Aussie hian a kum leha India rama nghah tur Cricket World Cup atan inzirlawkna an rawn nei a tih theih a. 

Hetih hunlai hi chuan Australia hi World Cup nomawi la chawi lo an ni a, world champion lai Kapil Dev-a leh a hote khualmuala rawn chaltauh tura India leilung an rawn rap kai hrim hrim hi hmasawnna a ni.

India ram chhim tawpa khawpui lian ber, sap ho hunlai aṭanga khawpui pakhat, vai ram ni si Zofate tluk zeta Hindi an uar lohna leh thiam lohna ram Tamil Nadu khawpui chu Chennai a ni a. Zawlkhawpuia Millennium Center a din hnua khawvel êng hmu ve chauhte chuan a sakhming hmasa Madras a ni ṭhin tih pawh an hre kher lo ang.

India chhim tawp ram intodelh leh hnam upa tak an nih bakah a ram lum leh uap lutuk mai khu hmakhawsang aṭanga a larna pakhat a ni ve a. An rama thlasik hmang mek Aussie ho tan chuan, khelmuala inkhelh ṭan hma aṭang hauhin boruak chu khelh tham a ni nghal phawt. A thlengtu branch Hamara Desh ho tan khaw lum chu ‘advantage’ a ni nghal pang mai.

He tour-ah hian Test match pathum leh One Day ṭum nga inhmachhawn tur an nih avangin captain pahnihin bul ṭan that chu a chanve zo an tih ṭhin chu an hre chiang hle. 

Mimkut thla tahrik 18-a Chepauk Stadium, Madras a ṭhumvawr tura Allan Border leh Kapil Dev an pen chhuah ṭum pawhin, a chak zawk zawk chuan vuak hmasak an thlang dawn tih chu furah ruah a sur ṭhin tih ṭawngkam tluk zeta chiang a ni.

A thlengtu tan mikhual laka ṭhat lo chhuah vaka, pitch hring leh ball sawh sanna tur lo buatsaih chu thil atthlak ber a ni. Chu ai chuan an hmanraw hman thiam spin ngei a, pitch ro leh sawt hniam hmanga lo dawnsawn mai kha a finthlak. 

Ṭhumvawra chak Allan Border-a'n inngaihtuah buai loin vuak hmasak a thlang a, ni 4 leh ni 5-na a, India spinner hmachhawn ngai loa an awm chu hnara hlit phawi ang huai a ni ngei ang.

Degree 40 zeta lum, boruak uap zawng pawh 80%, chhum reng reng lan lohna Madras ni sen sa hnuaiah chuan Australia-in India an rawn tlawh Series inkhel hmasa ber chu ṭan a ni ta. 

Fast bowler tan an inkhelhna pitch-in kawngro a su vak dawn lo tih hriat sa a ni a, Australia top order tan ni hmasa ber, pitch a la thar lam laia ball thar tle sar mai chu an advantage neih ṭhat ber a ni tih an hre ran a, bul an tan ṭha hle. 

Indian cricketer ropui ber zinga mi, pace bowling-ah nghat phei chuan a tluk sawi tur la awm meuh lo Kapil Dev-a meuh pawh a che hleithei lo. Kapil hian a career chhunga series tluan a, batsman pakhatmah a vawm hlum loh ṭum record duhawm lo tak a neih ṭum a thleng hial!

Tun lai lockdown khawvelah hian tu pawh mai hian thau leh hrisel loh hlauvin mahni hman hun hunah taksa kan insawizawi suau suau a, mahse ni khat thil thua kg 7 meuh mai han paih hi chu an awm dawn lo. Cricket khel ṭhin chuan century siam hi kan châk ber a ni a, kan vuak chhuah hmasa ber phei chu kan thih ni thlenga kan theihnghilh tawh lo tur thil a ni ngei ang. 

Dean Jones chuan ni khat thil thuah century siamin kg 7 zet a hloh tel bawk. Victorian tlangval hi hetih lai hian kum 25 mi a ni a, kum hnih zet hnuah Australia tana a inlan tawh loh hnuah a rawn let a, tunah erawh commentator lar tak a ni tawh.

Chepauk Stadium phul chunga ball tleng muang lutuk chuan four vuak a ti harsa a, Madras ni sa hnuaia, one leh two tlan zak zak chung chuan a test century hmasa ber chu an siam ve ta. 

Chutah Jones chuan a lawm nan bat a phar chhuak a, mipuiin kut bengin an lo lawm. A lehlam panga a dinpui pa captain rothap Allan Border erawhin double century siam tum turin a lo fuih sauh sauh.

Australia batsman Jones-a ṭawngkam ngei hi in la chhawng teh ang: "Run 120 ka siam hnu kha chuan mu leh mal ka nei tawh lo a, thlan ka hloh nasat lutuk avang khan ka mitmeng a phe ṭan a, ka tihrawl a inpawt a, ball rawn kal te kha ka hmu phe ruai a, mang fiah lo deuh ang ruai vek hi a ni tawh mai. 

Dehydration leh rehydration awmzia khang hunlai khan kan la hre thui si lo. Ka thi dawn ni ber hian ka hria. Nat vanga chawlh (Retired hurt) ka duh hial a, mahse ka dinpuipa kan captain rothap Allan-a thusawi khan min ti tlawmngai em a, ka ding lui ta zel a ni," tiin Chennai khaw luma inkhelh hautakzia a sawi.

Sports lam zir mi, mithiam leh psychologist-te thlirna aṭang chuan inkhel level sangah hi chuan a tute pawh hi hun harsaah pawh khel thei tura technique leh thiamna nei vek tawh an ni a. A rilru lam paukhauh apiang dinchanna a ni tawh mai an ti ṭhin. 

Chutia century ber siama duh tawk zai rel tawh mai Victorian tlangval chu, captain Allan Border a chuan, "I nep hle mai, India ramah hian picnic tura kal kan ni lo a, chak tura kal kan ni. I ding thei tawh lo a nih chuan, i chhuah pahin, i hawnna tur ticket manager laktir nghal ang che" an ti te te a. 

Tui pe tura 12 man lo lut hnenah chuan, Jones a hriatphak lekin, "Victorian ho hi chu an nawi tlat. Khaw nge Queensland mi Ritchie a kha rawn luhtir teh u" a ti zui zat bawk a.

Jones a tlawmngai chu ding chhunzawm zelin, vawi engmaw zat zuncheh leh luak chungin run 200 a tlan chhuah meuh chuan, lawm avanga bat phar tur pawh awm tawh loin khelmual charah chuan a let tawp mai a ni.

A thih dan hnua a rawn ṭhanharh meuh chuan Apollo Hospital khum laizawlah drip khai chungin a mu. Tun hmaa khelh ṭhat tawk loh avanga thlauh thlak ṭhin Jones chu Australia team dinhmun ṭhaa hlangkaitu a nih bakah cricket history-a innings ropui ber zingah a hming a chuang ta hial.

Australia chuan ni hnihnaah run 574 an puitlin hnuah an duhtawk (declare) a, India vuak hun a thleng. A vawm lama che ṭha lo Kapil Dev an inhrihkthlak nan hmangin century siamin run 397 an siam a, ‘follow on’ an pumpelh. Australia bat hun thleng lehin 2nd innings-a batsman panga chan chunga run 170 an siam hnuah an 

duhtawk (declare).

Ni lina chawhnu herah chuan India tan run 348 target siam sakin, Hamara Desh ho vuak hun a thleng leh ta. A ni telin khua a lum a, Australia dinhmun ṭha zawk mah se India tan pawh umphak theih a ni.

Degree 40 chuang a lum leh 80 % boruak uap hnuaiah Chepauk Stadium inkharkhipna concrete bang aṭanga boruak lum up up chuan inkhelhna boruak chu a tih lum belhchhah. Hetiang boruak lum karah hian Australia spinner Greg Mattews chuan kawrlum pahnih a ha tlat!

He inkhela vawm ṭha em em Greg hian a vawm loh laiin boundary line-ah ball a chang. Hetah pawh hian Greg hi ngawih a hnekin a hnung lama India team ho ṭhu hriat phak turin a khat tawkin, "A lum hleinem, nuam kan ti lutuk" a lo va ti ve sek bawk. Greg Matthews a kalna apiangah chuan mipui sing tel chu an haw haw dur dur zel mai a ni.

Umpire Vikramraju a chuan, "Matthews-a'n ball a vawm dawn a, a kawrlum pahnih hak lai leh a lukhum a phelh, ka kuta an hlanchhawn chuan, "Thlantui hi a sur hian a sur zawih zawih hi a ni ber a, inhrukfaina tur napkin ka dil phah fo a ni," a ti nghe nghe.

September 22, 1986-ah chuan a ni ngana khelh a ni a, session hnuhnung ber a inher meuh chuan India-in chak nan over 30 chhungin run 155 an la mamawh a, batsman pariat an la dam. 

Kar loah Chepauk Stadium pawh entu sing thum chuang an rawn pungkhawm ta. Over hnuhnung ber a nih meuh chuan India chuan chak nan run li chiah an mamawh tawh a, Australia tan batsman pakhat chiah vawm hlum an mamawh thung.

Inkhela boruak siamtu, vawm ṭha bawk Matthews a rawn pen chhuak. Australian spinner hian first innings-ah wicket nga a la a, second innings-ah wicket li a la tawh. India tana ding chu Ravi Shastri a ni a, tuna India cricket team head coach a ni. 

Shahstri hian ball hnihnaa run hnih a lak hnuin ball thumnaah run khat a la leh a. Score a inzat ta. Thil pakhat a chiang - India an chak lo thei tawh lo. Ball thum chiah a bang tawh a, India tan chak turin run khat chiah siam a ngai ta. Amaherawhchu, a vaw tur hi batting lama chhuan tur nei lo, bat hum zei lo ve tak, a ball ṭhuaivir thiam avanga thlan Maninder Singh a ni.

Ball 4-na chu mak tak maia a lo dan hnuah, sanain tlai dar nga leh minute 11 a kawk vang tawh. A ball ngana leh inkhela ball hnuhnung ber dawttu chu Matthews a chuan an vawm leh a, a pum ṭhelha lo ṭhelhin, Maninder Singh a ngalah a fuh. Stadium-a mipui sing thum chuang an reh ṭhuap karah Australia team appeal ri a thangkhawk rum rum.

Player leh mipuiin umpire an thlir 

ṭhup a, chutah umpire Vikramraju chuan a kutzungṭang chuan van lam a kawk vah a. India batsman an thi fai a, score a inzat! Test cricket inkhel vawi 4000 chuang awm hnua inhnehtawk vawi hnihna leh thleng leh tawh ngai lo chu khawvelin a hmu ta.

Ni nga chhung teh meuh mai patling 22 chak tuma ni sensa hnuaia an inkhuainuai hnuah, inkhel ṭan hmaa, chak zawk la awm lo ang chiah dinhmuna inkhel an tawp hi thil mak danglam ve tak chu a ni. A tawpah chuan Cricket game a chak a, infiamna khawvel chanchin a hausa ta sawt thung a ni kan ti thei awm e.