Barcelona khingpui tur PSG

Champions League last 16 draw chu nimin tlai khan UEFA hmunpui Nyon, Switzerland-ah neih a ni a, Spanish club lian Barcelona-in Neymar chhuhsaktu Paris Saint-Germain an hmachhawn dawn.

Last 16  first leg hi February 16, 17, 23 leh 24-ah khelh a ni dawn a, second leg hi March 9, 10, 16 leh 17-ah khelh a ni ang. Second round-ah group khata awm te an intum nawn thei loh bakah ram khat club-te an inhmachhawn thei lo.

Quarterfinal leh semifinal draw hi March 19-ah neih leh tur a ni dawn a, hetah hi chuan a sang pariata awm thei chin chu an intum thei vek tawh ang. Final hi May 29, 2021 khian Ataturk Olympic Stadium, Istanbul-ah khelh a ni ang.

Last 16 draw hi Champions League 1997-a Borussia Dortmund champion puitu leh World Cup 1994-a Switzerland hero Stephane Chapuisat hoa neih a ni. UEFA deputy general secretary Giorgio Marchetti chuan draw ṭan hma hian Gerard Houllier sunna hun a hmang.

Europe club ṭha 16 an nih avangin fixtures hmuhnawm a awm dawn tih chu a chiang a, duhthusama ṭha an pawt chhuak

Barcelona leh PSG inkhel tur hi kil hrang hrang aṭanga thlirin a ngaihnawm em em vek. February 14, 2017 khan PSG-in an mualah Barca 4-0 in an hneh. Catalan club hi tla turah ngaih ni tawh mah se Lionel Messi leh Neymar an kawl.

March 8, 2017-ah Barca-in Nou Camp-ah PSG 6-1 in an sawp a, aggregate-ah 6-5 in hnehna an chang. Football match awm tawha comeback ropui ber hiala sawi theih a ni a, Barca chakna goal siamsaktu hi Neymar a ni.

French club-in Barca duh lai Neymar hi pound maktaduai 200-in an lei chhuak a, Brazilian forward hian tun hnaiah Lionel Messi nena khelh dun a châk thu a sawi. Argentine forward hian Paris a pan dawn tia sawi pawl an awm a, tunah erawh thil chiang pakhat chauh a awm. Messi leh Neymar hi an khelh dun hmain an inhmachhawn dawn a, chu chu khawvel hmuh châk chu a ni.

Chelsea-in defensive game khel thiam Atlético Madrid an hmachhawn dawn a, Liverpool chu Manchester United pet chhuaktu RB Leipzig nen pawhfuh an ni. Manchester City an vannei a, German club vantlang Borussia Monchengladbach nen an inhmachhawn dawn. 

Champion lai Bayern Munich-in Lazio an hmachhawn dawn a, record nei ṭha Real Madrid-in Italian club Atalanta an hmachhawn dawn. Bayern leh Real hi an buk rit zawk mah se chesual thei an ni. Chutihrualin Sevilla leh Borussia Dortmund inkhel tur erawh an intluk tawk viau ang.