Premier League-in training dan thlah dul

Project Restart tih hming chawia Premier League-in 2019-2020 season khelh zawh ngei an tumna chuan hmasawn lam a pan zel a, taksa insi loa training an neih tawh hnuah Premier League player-te chu training an neih dan thlah dulsak an ni. 

Premier League chuan thuchhuah siamin, "Project Restart thawh hnihna chu a bul ṭan a ni leh tawh dawn a, player-te chu a huhoin an training leh thei tawh dawn a ni," an ti. 

Player-te hi training-naa tackling phalsak an nih loh ṭhin chu phalsak an ni leh tawh bawk a, hetihrual hian league chuan ṭul loa taksa insik tam chu pumpelh hram hram turin footballer-te chu a hriattir bawk - training pangngai ang tak tak kha chu a la ni thei lo ang. 

Premier League lamin training dan a thlah dul leh ṭan tawh dawn rual hian test result lamah erawh Covid-19 kai hmuh chhuah tur an awm reng thung. A vawi thum nana test an neih result-a a lan danin Premier League player leh staff zingah Covid-19 kai mi pali hmuh belh an ni. 

Coronavirus test thawh thumnaah hian player leh staff 1,008 chu test neihsak an ni a, English top flight league hian an test neih zat leh positive zat chhutin 'contact training' neih leh tawh hi an ngam niin a lang. 

Premier League-ah hian player leh staff 2,752 zet chuan Covid-19 test an nei tawh a, an zinga 12 chuan Covid-19 an kai tih hmuhchhuah a ni. Premier League club leh player-te hi kar khatah vawi hnih tal test neihpui tura hmalak a ni a, a vawi li nana test neih hunah chuan Premier League club pakhata vawi khata test neih theih zat hi 50 aṭanga 60-ah a kai chho tawh ang. 

Test aṭangin mi 12 an positive tih chiang mah se test neih zat mi 2,752 aṭanga chhut chuan positive zat hi 0.44% chiah an ni tihna a ni a, Premier League lam tan chuan chanchin lawmawm a ni. 

Premier League training thlah dul tur hian league hian an duh angin thutlukna an siam ngawt bik lo a, club, player, manager, Professional Footballers' Association (PFA), League Managers' Association (LMA) leh sorkar rawn chungin thutlukna hi an siam.

Project Restart thawh hnihnaah hian harsat em em em awm loa an kaltluang thei a nih chuan Premier League hian a thawh thumna a kalpui leh dawn a, hetah hi chuan tun hmaa training neih ang tak taka training neih leh inelna hmachhawn tura inbuatsaih ṭan a tel tawh ang. 

Coronavirus vangin Premier League hi March 13 aṭang khan chawlh lailawk a ni tawh a, hun rei tak season khelh zawh dan an ngaihtuah hnuah kar hmasa khan player-te chu taksa intawk fuh loa an training phalsak an ni. 

Premier League hian season hman zawh ngei chu thupui berah an nei a, league chief executive Richard Masters chuan, "June-ah chuan kan khelh leh theih tawh ngei kan ring tlat a ni," tiin a lo sawi tawh. 

Hriat tel tur erawh Premier League-ah hian fixture 92 ngawt khelh tur a la awm a, a harsa dawn - khawthlang media ṭhenkhatin an tarlan dan chuan English top flight-a club manager-te chu kar ruk chhunga league khel zo tura inruahman tura hrilh an ni.