Rangers-in Ianis Hagi an lalut

Romanian player duhawm Ianis Hagi chuan Steven Gerrard enkawlna hnuaia khel turin Rangers a zawm a, a contract rei zawng hi 'hun rei tak chhung atan' tih bakin tarlan a ni lo. 

Barcelona leh Real Madrid legend Gheorghe Hagi-a fapa hian January khan loan-in Rangers hi KRC Genk aṭangin a zawm a, inelna hrang hrangah match 12 khelin goal thum a khungsak. 

Scottish club hian a ngheta lakluh theihna an neihna chu bawhzui vatin a nghetin an lalut a, a man zat pawh hi puanzar a ni lo. Kum 21 mi forward chuan, "Glasgow-a lo kir a, Rangers tana inkhelh leh hi ka ngaih pawimawh hmasak ber a ni reng a ni," a ti. 

Hagi hian Romanian club Viitorul Constanṭa-ah a career ṭanin Fiorentina lamah pawh a lo kal tawh a, mahse Serie A club tan season khatah match hnih chiah a khel hman tihin Viitorul-ah bawk a kir. 

Romanian club aṭang hian season hmasa ṭan dawn khan Belgian club Genk chu pound maktaduai liin a zawm a, tunah erawh Rangers player nghet a ni ta. 

Rangers sporting director Ross Wilson chuan Genk chu indawrna an kalpui kawngah an puitlinna avangin a fak a, Hagi fak zuiin, "Kum 21 mi chauh a la ni a, a theihna tak tak kan la hmu dawn chauh," a ti. 

Hetihlai hian Rangers manager Steven Gerrard pawhin, "Hagi hi player enkawl nuam tak a ni a, training neih apiangin a hmasawnna hmuh tur a awm ziah a ni," tiin a player hi a fak.