Silly Point : Bye Bye 2023
Kum khata kan nghahfak Masi leh Kumthar vuakvet boruakin min rawn nuai leh ṭan a, Cricket khawvel erawh chawlh zai rel reng a awm thei lo. World Cup an khel zo chiah Hamara Desh ho pawh South Africa lamah an Masi hmang turin an thlawk liam veleh nghal. Leilung danin Rohit Sharma, Virat Kohli te ho pawh kum uaithla lam an lo ni ve ta.
Kum li hnua awm leh tur Cricket World Cup erawh dam rei nghah thil a ni ve tawh dawn. An fitness an vawn ṭhat tlat erawh chuan Virat Kohli erawh a la inlan leh thei turah ngai ila, amaherawhchu rinrawl ber ni tawh loin vanglai pel, senior player role khel a ni mah tawh zawk ang.
Kum 2023
Indian Cricket-in khelmual pawn lamah hma nasa takin a sawn a. IPL 2024 lo awm tur player lilam nimin piah lawkah zawh fel a ni a, he BCCI Balloon hi a ni telin a puar lian zel chu a ni a, puah darh hun a nei em lo turah ngai phawt ang. Chutihrual chuan India-in ICC Trophy nomawi an chawi hleithei tlat lo a, World Test Championship leh World Cup lamah a ṭha ber dawttu dinhmuna an lungawi a ngai mai si hrih a nih hi maw!
Jay Shah kaihhruai BCCI hian duh angin khelmual lamah hma an sawn chak lo riau kan ni thei a, Mizoram ticket a tel ve thei Mamon Majumder a telna BCCI Apex Council hi tun aia nasa zawkin chik an hlawh tawh ngei ang. A tawpah chuan infiamna khawvel a nih miau avangin, khelmual chhung hi a laili leh a focus ber a ni lo thei lo.
Mizoram Cricket
Mizoram pawh hma kan sawn kan ti dawn nge ṭum hmun pangngaiah kan sawt nawn mai mai tih chu hrechiang thuai dawn. January thla hian Ranji Trophy khelh a ni dawn a, India ram chhunga cricket inelna ngaihhlut inelna hian Mizoram Cricket hlimthla nasa takin a tilang ang. Junior leh Age group level-ah erawh champion ni tur chuan kawng a la thui tih chu tlang hriat a ni. He cricket - team infiamna ni si, mimal a inelna platform zau berah hian, kan players ṭhenkhatten record an rawn siam ṭan der erawh thu ngaihawm a tling. I kal zel ang Mizoram Cricket.
Cricket Association of Mizoram lamah loh theih loh avangin dinhmun inthlak a lo ngai a. BCCI a kan luh hnuah a ṭum khatna atan a ram leilungfa P. Lalremruata chu General Secretary-ah thlan tlin a lo ni ta a. Hmachawp leh thil tum nghet tak a nei ni te pawhin a hriat a, hun erawh a nei tam lo. Sorkar thar - kalphung thar tih au hla ang deuhin, CAM kalphung thar leh Professional zawk kan hmu chho zel turah ngai ila. He team game-ah hian a hnuk ber GS position aṭang hian Mizoram ṭhalaiten Cricket hmanga hma an sawnna tur erawh chhum lo chat loin a ngaihtuah a, a Apex Council puite nen 2024-ah chuan pen hnih khat talin rahbi thar nen hma kan sawn ngei turah ka ngai.
Kum 2023, Cricket Action tam tak kan paltlang a, kum chhinchhiah thlak tak te pawh a ni awm e. Kumin atan chuan kan in mangṭha phawt mai ni se. 2024 lamah dam tein kan awm ang a, Silly Point lamah kan inhmukhawm leh thei turah ngai ang. Krismas leh Kumthar Chibai leh hman nuam vek u le.