IPL history-a player man to ber Mitchell Starc

Cricket khawvela sum tamna ber Indian Premier League auction chu December 19, Thawhlehni khan Dubai-ah neih a ni a, sum chevel a hraw hle. Australia-in Cricket World Cup-a an champion rah an seng a, an player pawimawh pathum Mitchell Starc, Pat Cummins leh Travis Head te man zat belhkhawm chu nuai 5,205 a tling pha hial.

Kum 33 mi Starc hian tun hmain Royal Challengers Bangalore tan a khel tawh a, kum 2015 hnuah a khel tawh lo. Covid-19 lai khan khel tur a ni a, hrileng vanga inkhuahkhirhna a tam avangin a khel lo. Kuminah erawh Australian bowler hi auction-ah telh a ni a, nuai 200 aṭanga inṭanin Kolkata Knight Riders chuan nuai 2,475 zetin an chhang. Nikuma Punjab Kings-in England all rounder Sam Curran an leina nuai 1,850 a khum chiang hle.

Australia all rounder Pat Cummins pawh Sunrisers Hyderabad-in nuai 2,050 zetin an lei bawk. 2024 Indian Premier League hi IPL vawi 17-na tur a ni a, March 29 – May 26, 2024 chhunga khelh tura ruahman a ni.