India-in South Africa lakah series la

India-in December 21, Ningani zan khan South Africa chu Boland Park-ah 78 runs-in an hneh a, ODI match thum khelhah 2-1 in series an la. Men in Blue tan Sanju Samson a che ṭha a, century 108 a siam; match tawp bera wicket li (30/4) latu Arshdeep Singh chu player of the series-ah thlan a ni bawk.

Ṭhumvawrah South Africa an chak a, vawm hmasak an thlang. India opener pahnih Rajat Patidar (22) leh Sai Sudharsan (10) te che ṭha tawk lo mah se Samson-a'n ball 114-ah 108 runs a rawn siam a, Tilak Varma (52) leh Rinku Singh (38) ten rawn thlawp ṭha bawkin over 50-ah 296/8 runs an siam.

South Africa-in bul an ṭan chhe lo a, opener Tony de Zorzi-a'n ball 87-ah 81 runs a rawn siam a, amaherawhchu target a san hret avangin wicket an hloh nasa. Arshdeep Singh-a'n wicket li a lak bakah Avesh Khan (45/2) leh Washington Sundar (38/2) ten wicket hnih ve ve an rawn la a, over 45.5-ah 218 runs chauh siamtirin an vawm hlum vek. India hi 78 runs-in an chak.

India leh South Africa ten Test Match vawi hnih an khel zui leh dawn a, December 26-30, 2023 hian Centurion Park-ah match hmasa zawk an khel ang a; January 3-7, 2024 hian Newlands Cricket Ground-ah Test match vawi hnihna an khel leh ang.