Krismas hma EPL match hnunung Liverpool khelmalah Arsenal

Premier League champion tur a la chiang lo nasa a, chumi hma chuan Krismas laia hmahruaitu an tichiang hmasa dawn. Zanin dar 11:00 hian Liverpool khelmual Anfield-ah Arsenal an leng lut dawn, inkhel a hmuhnawm ngei ngei ang.

Gunners hi tun dinhmuna hmahruai mektu an ni a, anmahni hnaih bertu Reds aia an sanna erawh point khat lek a ni. Mikel Arteta naute tan Masi laia hmahruaitu ni turin chak a ngai a - Jurgen Klopp leh a naute tan pawh chak tho a ngai.

A chhan chu - nizan khan Aston Villa an inlan, Unai Emery naute hian Sheffield United an hneh a, zanina Arsenal leh Liverpool te an inhnehtawk a nih chuan Villa hi Krismas laia hmahruaitu an ni daih thei thung!

Anfield boruak

Tun hma aṭangin Liverpool khelmuala lenluh hi team lian tan pawh a huphurhawm ṭhin, anmahni khelmualah chuan team danglam an ni a, an danglam chhan pawh mual sir aṭanga ṭantu ruhkawl 'Kop' ho thawmna leh tawrhhlehawm lutuk vang a ni.

Anfield-ah hian Arsenal pawhin chakni hmel an hmuh lohna a rei ta, league match bikah phei chuan kum 10 bawr vel chu hnehna hlado an chham theih lohna hmun a ni a, an record ṭha lo tak hi thaibo theih ni se an ti khawp ang.

December thla chhungin match khelh tur an ngah tlang vek. League Cup an khelh avangin Liverpool hian an ngah zual hret - kar laihawla West Ham an hneh ṭumin Klopp chuan Arsenal an mikhual hunah fans lam chu nasa taka che turin a kar.

German manager hian a tir aṭanga a tawp thleng thlawpna an mamawh thu a sawi a, chumi tur chuan ni dang zawng aiin Kop pawh pawh an thawm a ring mai thei. Hetiang boruak tak hi champion tum Arsenal lam tan fiahna a ni ve thung ang.

Fimkhur ngai Reds

Liverpool player zingah yellow card hmuh hlauhawm an awm nual, yellow card vawi nga hmuh hian match khat khel thei lo tura hrem an ni ṭhin. Alexis Mac Allister chu tun season kal laia hrem tuar tawh a ni a, Darwin Nunez chu card vawi khat a hmuh belh chuan hrem tuar thei a ni bawk.

Gunners bakah ruai ṭheh niah (Boxing Day) Liverpool hian Burnley an tum leh dawn, heng inkhel pahnihah hian Trent Alexander-Arnold leh Wataru Endo ten card an hmu a nih chuan kum thara Newcastle United an hmachhawn hunah an inlan thei dawn lo, fimkhur an ngai dawn hle.

Hliam vangin zaninah Mac Allister leh Diogo Jota te a inlan thei dawn lo. Mahse, Klopp-a'n tlarhma lamah Mohamed Salah, Nunez, Cody Gakpo leh Luis Diaz te a la nei tho a, goal khung lamah chuan buaina an nei lo tura ngaih a ni.

Salah a dam a, nuamti taka a inkhelh theih hi chuan Liverpool an thlamuang ṭhin. Egypt international forward hian club lian a ngam ṭhin hle, season kal laiah pawh league goal 11 a khung leh tawh avangin Arteta-a'n a ven dan tur a ngaihtuah fe a ngai ang.

Rice leh Saliba

Season hmasa khan Arsenal boruak a fuh a, chak inring tak chungin Anfield an lenglut - mahse an boruak ṭhat lai pawhin 2-2 in an va inhnehtawk pui. Reds khelmual an tlawh hnuhnung hian 2-0 a hma an hruaina an hum thei lo a ni.

Attacking game khel ṭhin an nih avangin zaninah pawh goal chu an khung leh mai a rinawm, anmahni goal an venghim thei ang em tih chu zawhna a ni zawk. An intawn hnuhnung hian William Saliba a inlan thei lo, zaninah erawh a inlan thei tawh ang.

France international hi tlarhnung laia rinrawl a ni a, Brazilian defender Gabriel nen an inkawp rem. EPL club zingah tun season chhunga goal chhuah tlem ber (15 Goals) an ni, chutihrualin Liverpool nen an goal chhuah tlem lam hi a inzat.

Arsenal beiseina siamsaktu pakhat chu Declan Rice a ni. England international ho hian tun hma lama an hneh hleih theih loh Manchester City meuh pawh an hneh thei tawh a, an chak hleih theih lohna Anfield an luh chhuah thei a nih chuan champion turin an puitling ve tawk tawh tihna a ni thei bawk ang.