Hneh loh nei loin Aizawl FC an kal zel

Aizawl FC chu kum 2023 atana an match hnuhnung berah I League club thar Inter Kashi nen 1-1 in an inhnehtawk. December 21, Ningani zan inkhelah hian mikhual Inter Kashi-in Mohammed Asif Khan hmangin an khung hmasa a, Aizawl FC-in substitute K. Lalhmangaihkima hmangin an sut.

B. Malsawmzuala kaihhruai Mizo club hian I League-ah match sarih chhung hneh loh an tawng tawh lo a, foreigner pahnih lek nei chunga an result hi a ṭha hle. Aizawl FC hian match 11-ah point 19 an hmu a, table chunglamah an awm.

Hun ṭha bawhpelh

December thlasik boruak nuam tak hnuaiah I League hi khelh a ni bawk a, entu pawh an ṭha - Mizo club hian entu zat hi mi 3,485 niin an chhal. Aizawl FC-in Inter Kashi lakah ball chang tam zawk thei lo mah se goal chance erawh an ngah zawk.

Ṭan phatah midfielder Lalthankhuma'n box pawn aṭanga lalutin crossbar chungah chiah a pet. Inter Kashi defender chesual zarah chance ṭha bik an nei a, Lalrinzuala'n Tharpuia pein Champhai Kanan tlangval pass chu K. Lalrinfela tan duhthusam a ni. Mahse, Mafela hian vengtu a nei lo chungin a pet ṭha tawk lo a, keeper Arindam Bhattacharya-a'n a dansak.

Tun season I League-a goal kua khung tawhtu Rinzuala'n goal khung belh a ngai pawimawh ber lo a, ṭhiante siamsak a thlang a tih theih. Rinzuala hian Mafela through ball chu um lutin mahnia titlang loin Tharpuia a pe a, Aizawl FC winger Tharpuia hian box chhung aṭangin goal zawnah a pet thei lo.

R. Lalthanmawia pawhin box chhunga ball a la lut a, a cross-shot chu goal pawnah chiah a kal. Mizo club hi goal khung hmasa thei ni mah se hun ṭha an bawhpelh a, first half-ah goal an khung lo.

Hei le, Inter Kashi

Inter Kashi-in player hming langsar an lalut nasa a, foreigner pawh an ngah. Minute 43-naah Edmund Lalrindika ball pek chu Mario Barco-a'n box kilah a chang a, Spanish forward hian petna tur khawp ṭha taka a insiam hnuah goal-ah petin goal ban per mah se a per chu Asif zawnah chiah kalin Inter Kashi winger hian goal ruakah a khung.

Second half-ah Inter Kashi-in chance an nei hmasa zawk a, first half-a player hmuhnawm ber zinga mi Mizo forward Edmund-a'n ball ṭha zet a hmu a, Lunglei tlangval hian keeper chiah a hmachhawn hnuah a pet goal lo.

Counter attack hmangin Inter Kashi an hlauhawm zel a, Edmund-a ball ṭha chu Mario-a'n box chhungah chang mah se a ball pet kawh ṭha zet chu Aizawl defender Lalmuanawma'n (Munez) mak takin a dang hman.

Aizawl FC-in goal khung an tum luatah tlarhnung an ngaihthah a, Mario-a'n halfway line ball changin keeper Nora Fernandes chauh awmna Aizawl FC lamah a khalh phei. Spanish forward goal khung tur hi Aizawl FC keeper hian a dansak a, ball-in goal lam la pan tho mah se goalline a pelh hmain Cherhlun tlangval TK-a'n a pet chhuak hman.

Substitution awmze nei

Aizawl FC coach B. Malsawmzuala'n substitution awmze nei a siam a, bench aṭangin Hmangaihkima leh Lalbiakdika te a luhtir. Mual vei lam sirah Champhai Zotlang tlangval BD-a a hmuhnawm a, Inter Kashi tlarhnung tan hnawksak a tling.

Minute 88-naah BD-a hian ṭha zeta la lutin goal-ah a pet a, Inter Kashi defender Anil Chawan-a'n dang mah se a per chu Hmangaihkima zawnah chiah tlain Tuithiang midfielder hian goal-ah ṭha zetin a pet lut.

RG Stadium-ah mipui thawm a ṭha a, Aizawl FC-in chak beiseina an nei thar bawk. Mizo club-in an nawr chhunzawm a, injury time-ah chakna goal khung ngei tumin an nawr mah se an duh ber goal an sual chhuak ta lo.

Aizawl FC coach B. Malsawmzuala chuan, "Ka naute inpekna a fakawm a, an theihna zawng zawng an chhuah avangin ka lawm. Kan duh ber point thum hlawh chhuak lo mah ila, kumina I League-a kan chet dan a lawmawmin ka hria. Krismas chawlh kan hmang ang a, nakkumah result ṭha zawk nei turin rim zawkin kan thawk ang," tiin Vanglaini a hrilh.