Urlawk zanah Chelsea

Ṭhenkhat an inkhawm ang a, mi ṭhenkhat chu khaw laiah hlinna zawnin an vak chhuak ang - duh takte nena hun hmang pawh an awm dawn, mi ṭhenkhat erawhin an duh ang ngeiin football hmuhnawm nen Urlawk zan an hmang thei dawn.

Pathianni zan dar 6:30-ah Premier League a awm dawn. Wolves chuan Mizo nena inthlunzawm ṭha tak mai Chelsea an mikhual dawn, hriat nawn leh a tan Blues khelmual Stamford Bridge-ah khan 'Mizo' tih an tarlang khalh tawh a ni.

Mauricio Pochettino-a'n mawhphurhna a lak chinah Chelsea hian dam kim an nei lo, dam kim thlap chu thil theih pawh a ni kher lo ang, chutihrualin Poch hian a player ṭha leh duh bik angte pawh a ruala chhawr a la nei lo tiin a sawi theih ang.

Tlarhma lama rinrawl tur Christopher Nkunku a dam a, minute 90 khel turin a inpeih tawh. Hetih lai hian captain Reece James erawh malpui hliam vangin hun rei tak a chawlh a ngai dawn tih an puang, tun season chhungin a lo kir leh hman a nih pawhin a inlan tam a rinawm tawh lo.

James bakah hian Ben Chilwell pawh dam chho ṭan mah se Wolves hmachhawn tur chuan a la inpeih lo. Argentine manager Poch-a'n dam se la chuan James leh Chilwell te hi mual sir ding leh vei lama dah a duh ngei ang, mahse a rem rih tlat si lo a ni.

Enzo Fernandez leh Moises Caicedo te an rintlak a, an academy chhuak Conor Gallagher pawh tun hnaiah a khel ṭha ṭhin. Midfield an inrem ṭhat chuan a hma lam pawhin goal an khung thei mai tura ngaih a ni a, an buaina tur chu a hnung lam a ni ang.