Ten Hag hun an pek ringtu Moyes

Sir Alex Ferguson a chhuah khan a hmunruak luah tur an inrinsiak laih laih a, chutiang boruak karah chuan 'The Choosen One' a hming tak chu David Moyes lak a ni, beisei erawh phak loin a hnuah an ban.

Manchester United manager ni lai mek Erik ten Hag pawh tunah hian ban mai theih dinhmunah a ding mek, tun hma lama an lo ban tawh - tuna West Ham manager Moyes chuan Ten Hag hi hun an pek rih a ring.

Zanin dar 6:00 hian London Stadium-ah Hammers hian Man United hi an lo mikhual dawn. Tun season league match vawi 17 an khelh tawh chinah chuan United hi point khatin an sang zawk mek, zanin a result hian an dinhmun a ti danglam daih thei.

Tun hmain Man United manager zingah Liverpool an ngam loh hnua ban tawk an lo awm tawh ṭhin. Ten Hag erawh Reds lakah a tlawm lo a, a hna a chelh chhunzawm ni pawhin a lang - Hammers a ngam lo a nih erawh chuan ban duh tute thawm a ring leh ang.

West Ham manager Moyes chuan, "Manchester United chungchang hi sawi ka duh vak lo. Mahse, an manager hi a duh anga hna thawk thei tur leh, a tum ram thleng thei turin hun ṭha an pek chu ka beisei," tiin amah ang bawka manager chu an ban mai loh a duhsak.

Moyes-a naute hian Carabao Cup lamah Liverpool an ngam lo hlim a ni a, chutihrualin Reds lakah hian an player ṭha Lucas Paqueta, James Ward-Prowse leh Emerson te chu bul ṭan tir lohin hahchawlhna hun pek an ni, zaninah a bul aṭangin an khel ang.

Man United tan striker Rasmus Hojlund-a'n league match 13 aṭangin goal a la khung lo, beisei angin Marcus Rashford a che na lo bawk. Season kal aliah United team pumpui hian league goal 18 chauh an la khung a, anmahni aia khung tlem chu team panga chiah an awm.

Ten Hag leh a naute buaina hi goal khung lam a ni ber mai. Jadon Sancho chu boruak dang vangin an chhawr duh si lo, hliam damkawr Anthony Martial leh rawlthar Alejandro Garnacho te chungah mawhphurhna a sang leh dawn.