Tlangnuam an champion

Cricket Association of Mizoam (CAM) hnuaia inelna 3rd Division Screening chu nimin khan khelh zawh niin, final inkhel hmunawm takah Tlangnuam chuan Tyrants lakah run 58-a hnehna changin an champion.

Ramhlun Sports Complex-a inkhelah hian Tlangnuam tan Malsawmzela chuan run 16 a siam bakah wicket li lain Man of the Match atan thlan a ni a, an champion theih nan a thawhhlawk hle.

Ṭhum vawra vannei zawk Tyrants ten vawm hmasak an thlang. Tlangnuam tana bul ṭantu Jeremy Lalhruaitluanga (23 runs) leh wicket keeper Lalhumhima (33) ten an che ṭha a. PC Malsawmzuala (33), Lalmuanpuia (18) leh Malsawmzela (16) ten thlawp ṭhain, over 20 chhungin run 168 an siam a, wicket kua an hloh.

Tyrants bowler zingah Viraj Tiwari-a chuan vawm ṭha berin wicket thum a la a, tun tournament khel ṭha tak Amarjit Thakur chuan wicket hnih a la ve bawk a ni.

Tytants tan chak turin ball 120 aṭanga run 169 siam a ngaih avangin chet fuh a ngai. Opener Abhishek Chhetri-a'n run 16 a siam a, target a san vangin pressure na tak karah Prasant (42) leh Amarjit Thakur (17) tih loh chu langsar taka che thei an awm lo.

Tlangnuam bowler zingah wicket la thei tak PC Zothankima'n wicket li a la a, Malsawmzela’n wicket thum a la ve bawk. Tyrants lam hi run 110-ah an vawm out vek a ni.