A chung berah Real

Real Madrid chuan Krismas hmaa an league match hnuhnung berah Alaves chu 1-0 in an hneh a, hmahruaitu Girona-in 1-1 a Real Betis an inhnehtawkpui bawk avangin La Liga table chung ber luah chungin Krismas an hmang dawn.

Ningani zanah Real-in Alaves an lenchilh hmain Girona-in Real Betis an lenchilh a, Artem Dovbyk-a penalty hmangin Girona hian goal hmahruai an khung - he goal hi an chakpui mai dawn niin a lang hman a, mahse, hun tawp nan minute hnih chiah a awm tawh tihah Germán Pezzella chuan Betis tan si phurh sutna goal a khung.

Real-in Girona chak zawh loh thu hre sa chungin Alaves an lenchilh a, mahse, beisei an phak lo. Minute 54-naah defender Nacho chu Samu Omorodion laka a foul avangin hnawhchhuah a ni a, an in draw ve mai dawn niin a lang.

Mahse, hun pek belh minute hnihnaah Toni Kroos-a corner aṭanga ball kal chu Lucas Vazquez chuan a tauh goal a, 1-0 in Real Madrid an chak - Girona nen an point hmuh zat a inang a, head-to-head ah an record a ṭhat zawk avangin hma an hruai.

Zanin dar 8:00-ah Atletico Madrid chuan Sevilla an mikhual ve leh dawn a, he inkhel zawh rual hian Spanish top flight league hian Krismas chawlh an hmang zui ang a, January 2 aṭangin an khel ṭan leh ang.