BWF-in Olympic qualifier pawtsei

Badminton World Federation (BWF) chuan Covid-19 vangin calendar a siamṭha nual tawh a, nakkuma neih tur Tokyo Olympic qualifier khelh hun chhung pawh a pawtsei.

International Olympic Committee (IOC) chuan kumin nipui laia neih tur Tokyo Olympic chu nakkum atan a sawn a, inelna neih hun kum khat chhung atana sawn hlat a nih vang hian qualifier khelh hun an tih sei pawh hi a pawmpui nghal.

Kumina inelna neih tur, hri leng vanga khelh hun sawnho erawh chu Olympic qualifier atan hian hman a ni dawn lo; nakkuma neih tur inelna ho chu hman a ni thung ang, infiamna khawmpui lianah hian ranking sang zual 16 an inlan thei ṭhin.

BWF secretary general Thomas Lund chuan, “March thla chawhnu lam aṭangin inelna kan nei thei tawh lo, beisei dan chuan kumin tawp lamah tournament kan khel pangngai leh chauh ang.

“Hri lengin min tih buai miau avangin Olympic khel tur zawnna pawh a hun chhung kan ti sei a, player tana ṭha turin ruahmanna siam a ni,” a ti. India aṭanga inlan tum Saina Nehwal leh Kidambi Srikanth te tan chanchin ṭha a ni.