European Super League - thiam an chang; engtin nge ni zel dawn?

Club 12-in a tira an din, duh lohna nasa tak lantir a nih avanga pakua ngawtin a hnu lawka an bansan zui European Super League chuan thawm an nei leh ta - Ningani khan European Court of Justice (ECJ) chuan ESL hi thiam an chantir!

Football khawvela thuneitu sang ber FIFA leh European football enkawltu UEFA chuan ESL din tirh a nih khan an dodal a, mahse, ECJ chuan FIFA leh UEFA hmalak dan chu, "Dan lo ang a ni," an tihsak a, media rights chungchanga an hmalak dan pawh club, media company leh fan-te tana ṭha lo tak a nih thu a sawi.

Darkar rei lotê hnuah European Super League-in thawm an rawn nei nghal a, ESL thar atana an hmachhawp an rawn tlangzarh nghal - hei hian football khawvel a nghawrnghing nghal a, mahse, ESL puan hmasak ber a nih ang em erawh a ni ta lo.

ESL puan hmasak ber a nih kha chuan European football-a club langsar an tel deuh vek avangin football thuneitute leh fans an hlauthawng a, lungawi lohna pawh an lantir nasa hle - tunah erawh ESL-a langsar taka tel hi Real Madrid leh Barcelona chiah an ni rih a, a hma ang taka hlauhthawnna a awm ta rih lo niin a lang.

A danglam lo

FIFA president Gianni Infantino chuan, "Vawiin thutlukna hian engmah a thlak danglam tak tak lo," a ti a, ECJ thutlukna chuan football khawvel a sawi danglam loh thu a sawi a, chutihrual chuan ngaihthah ngawt erawh a rem chuang lo.

ESL puan a nih hmasak khan Real Madrid president Florentino Perez chu a puangzartu ber a ni a, tunah erawh, Super League din tumna kawnga puitu tura club-ten an sawm luh A22 chu media hmachhawntu ber an ni ta.

Court-in thuchhuah an siam hnu lawk hian UEFA chief executive Bernd Reichart pawhin thuchhuah siam ve nghalin, "UEFA lalna chu a tawp ta a, football chu zalen a ni ta," a ti a, a phur hle.

Reichart chuan, "ECJ thutlukna hi a langtlang khawp mai. UEFA-in kan hmalakna min chungtlak dan a tarlang a, an thuchhuah kha a chiang viau vek. Football tan ni lawmawm tak a ni," a ti.

Ruahmanna chu

A22 hian Super League atana an ruahmanna thar chu an pholang nghal bawk a, mipa inelnaah team 64 awmin, division pathumah ṭhen hran an ni a, hmeichhe team pawh 32 awmin, division pahnihah ṭhen hran an ni bawk.

He ruahmannaah hian a hmasa angin club hming bik tarlan a ni tawh lo a, mahse, ngei ngeia club telten sum an dawn theihna tur te, club telte inrawnkhawm hnua, remtih tlanna thlapa pawisa sem te, digital streaming platform a thlawn veka hman chungchangte a tel.

ECJ thutlukna siam hnuah UEFA president Aleksander Ceferin leh European Club Association (ECA) chairman Nasser Al-Khelaifi te chuan media an hmachhawn ve lehnghal a, ESL ruahmanna chuan a tihhlauhthawn loh thu an sawi.

Zoom call hmanga press conference an neihah hian media chauh ni loin, league hruaitu, players leh fans aiawhte pawh an tel vek a, UEFA leh ECA lam hi ṭawngkamah an insum lo.

Thu leh hla

UEFA president Ceferin chuan, "Kum 2021-a an ruahmanna hmasa, mi zawng zawngin kan hnawl tak ai khan tuna an ruahmanna hi a inkharkhip lehzual a ni. An kawng dal kan tum dawn lo a, an duh ang chu an din thei alawm.

"Club pahnih hmang hian an competition ropui tak chu an ṭan thuai ka beisei. An thiltih hi an hrechiang turah ka ngai a, rin ngam erawh an harsa ka ti. Football hi a duh apiang hnena hralh ngawt chi a ni lo," a ti a, ESL a hlau lo hle.

ECA hotupa leh PSG neitu ni bawk Al-Khelaifi pawh a insum duh lo a, Qatari sumdawng hausa chuan, "A22 hi tute nge an nih?" tiin tham lo zetin an zawt phawt a, a hnuah, "Khawi aṭanga lo kal nge an nih? Eng sulhnu nge an neih a, eng ang mi nge an nih? Keini chuan mi tak tak chiah kan dawr duh," a ti zui.

Al-Khelaifi chuan sawi zawmin, "Tunah hian club pahnih emaw pathum emaw vel, kan lam ṭang lo an awm. Mahse, keini chuan kan ensan dawn lo a, kan vau lo bawk. Kan zinga tel zel an duh pawhin kan pawm em em a, ECA chuan a sang zawk zel a duh a, chu chu thudik a ni," a ti.

Club aiawh

Al-Khelaifi chuan, "Club zawng zawng tana ding nih kan duh a, tum inang vek kan ni. Nuam takin rilru hmun khat puin kan awm a, khawih danglam theih a ni lo. ESL din an duh a nih chuan a pawi lo - mahse, khawvela club inelna hlu ber chu Champions League a ni reng ang.

"Champions League hi rei tak kalpui a lo ni tawh a, nangni pawhin inhria. Football zahawmna humhim turin kan vaiin kan thawk ho a ni," a ti - Real leh Barca baka ESL thlawp reng ṭhin, a tira an zinga tel Juventus chuan tun hnai khan he inelna hi an thlawp loh tur thu hriatthiam theih takin an tilang bawk.

Premier League club zingah Manchester United chu ESL an zawm loh tur thu puang leh hmasa ber an ni a, a hnu lawkah Manchester City, Tottenham Hotspur leh Chelsea ten puang ve lehin, German football chawi nungtu Bayern Munich leh Borussia Dortmund bakah Serie A club Inter Milan ten an zawm loh tur thu hi an sawi bawk a ni.

Hetihlai hian A22 hotupa Reichart erawh a la inringtawk viau a, Reichart chuan, "Promotion leh relegation a awm dawn a, tualchhung league-a chet ṭhat dan a zira khelh tur a ni. Kan rilru a inhawng em em a, thurawn kan la thei reng - club leh league te kan dawr ang," a ti.

Mahse maw

ESL hi ngaihthah ngawt erawh a rem lo. Italy leh France sorkar chuan an ram club zinga he inelna zawm tum an awm chuan a dal dan tur an ngaihtuah dawn nia sawi a ni a, England lam thawnthu pawh a danglam bik lo.

England bik phei hi chu, ESL din tumna a awm hmasak khan khatihlaia prime minister Boris Johnson leh lal chhungkua thlengin an inrawlh a, European Super League din tumna chu an dodal na hle.

ESL hi a thamral zui a nih ngawt loh chuan, UEFA nen an inkar boruak hi a awm chho zel dawn niin a lang a, court thu chhuak pawh kan la hre nawn fo mai thei - hetihlai hian ECA lamah nghet takin Al-Khelaifi a ding bawk.

PSG neitupa Al-Khelaifi hausakzia inhrilh nawn a ngai lo a, an ram hausa tak Qatar-in a thlawp piah lamah hmathlir thui tak nei a nihna hi European club tam takin an ngaihsan a ni - ani kaihhruainain ESL an do dawn a, UEFA lam an dingchang zawk a nih pawhin mak ti suh.