Premier League Krismas laia hmahruaitu hi an champion zui em?

Arsenal-in kum 2004 hnua a vawi khat nan Premier League nomawi chawi an tum a, kum 2022 Krismas laia league hmahruaitu an ni a, kuminah pawh Krimas laia hmahruaitu an ni leh thei bawk. Nikum khan Gunners hian point 37 an hmu a, khelh zat inangah champion Manchester City aiin point ngain an hmu tam zawk. Mahse, season tawpah Man City-in point 89 an hmumh laiin kuminah erawh point 84 hmuin pahnihna a ni.

Kuminah Mikel Arteta hote hian champion ngei an tum ruh tawh a, nipui bazarah pawh sum an seng nasa. Chutihrualin kumin bikah erawh Premier League nomawi hi Arsenal leh Manchester City chauhin an inchuh tawh lo a, Liverpool-in an chuh tel tawh. Zanina Arsenal-in Liverpool an hneh lo a nih phei chuan Krismas laia Premier League hmahruaitu tur chu Jurgen Klopp-a kaihhruai Liverpoool an ni dawn. A chung bera Aston Villa an awm theih dan a awm bawk.

Premier League hi vawi 31 khelh a ni tawh a, Krismas laia hmahruaitu hi vawi 16 an champion. League-a vawi khat champion ve tawh Blackburn, Leicester City leh Liverpool te kha Krismas laia hmahruaitu vek an ni.

Chutihrualin league-a vawi nga champion Chelsea pawh nomawi an chawi ṭum hian Krismas laiin hma an hruai vek. Arsenal erawh vawi thum an champion-ah vawi khatmah Krismas laiin hmahruaitu an ni lo.

An elpui Man City hi vawi sarih an champion tawha vawi thum an champion-ah Krismas laia hmahruaitu an ni a, vawi li dangah hmahruaitu an ni lo. Kuminah pawh Man City hi dah bo a thiang lo a, nakkumah Kevin de Bruyne a rawn khelh tawh dawn avangin ho lam taka point hloh tawh lo tura ngaih an ni.

Chutihrualin pawimawh ta ber chu Krismas laia hmahruaitu nih lam a ni chiah lo a, engzatinnge hma an hruai tih leh engvangin nge hma an hruai tih hi a ni. Tun season bikah chuan Krismas hmain match 18 an khel hman dawn a, Arsenal emaw Liverpool emaw pawhin hma hruai se, an inthlauhna a tam dawn lo. Season tawpah eng team pawh champion se, Krismas laia hma an hruai vang chu a ni lo ang.