David Luiz a chhuak mai thei?

Arsenal defender David Luiz chuan tun season tawp rual hian Emirates Stadium a chhuahsan mai thei niin khawthlang media-te chuan an tarlang, a chhuak a nih chuan a contract a hmang zo dawn lo tihna a ni.

Nikum nipui bazar ni hnuhnung berah Luiz hian Chelsea aṭangin Gunners hi pound maktaduai 8-in a zawm, an inrem dan chuan season hnih chhung atan tih a ni a, kumin hi season khat a hmanna chauh a la ni.

Mahse, Sky Sports-in a tarlan dan chuan Luiz contract hi kum khat chhung atan a ni a, season khat dang hi chu inbiak ṭhat leh tura tih a ni. Tunah hian inbiakna thar a awm loh avangin a chhuak dawn niin an tarlang.

Mikel Arteta-a’n North London a enkawl chinah Luiz hian hmun pawimawh a chang, a khelh danah pawh season tir lam ai chuan hma a sawn zawk niin a lang. Premier League an khel chhunzawm a nih pawhin rinrawl a la ni phak dawn.

Amaherawhchu, Champions League an khelh phak loh chuan sum hmuh tur an nei tlem a, coronavirus buaina in a nghawng bawk avangin player ṭhenkhat an chhuahtir a nih pawhin a mak lo ang.