Nagelsmann hoten hun ṭha bawhpelh

Bundesliga-ah Borussia Dortmund-in Bayern Munich an hneh loh avangin RB Leipzig-in pahnihna nih theihna hun ṭha an nei a, amaherawhchu Nilaini zan inkhelah Julian Nagelsmann hote hi Hertha Berlin nen 2-2 in an inhnehtawk.

RB Leipzig hi pathumnaah an awm a, Champions League khelh tuma inchuh boruak a sang. Zanin dar 12:00 hian panganaa awm Bayer Leverkusen-in Freiburg an hmachhawn dawn. Champion lai Bayern Munich sang ta deuh mah se an hnuaia awm Borussia Dortmund (57), RB Leipzig (55), Borussia M'gladbach (53) leh Bayer Leverkusen (53) te an inhnaih hlawm hle.

Red Bull Arena-ah RB Leipzig-in point thum hmuh an inbeisei a, Hertha BSC-in hna an tih awlsamsak lo. Minute 9-na lekah Marko Grujic-a'n Marvin Plattenhardt-a corner pet chu a volley lut a, mikhualin hma an hruai. Kum 24 mi Grujic hi Hertha-in loan hmanga Liverpool aṭanga an hawh a ni a, intuai hriam turin German club hi a zawm.

Team ṭha zawk Leipzig-in siphurh an sut thuai a, minute 24-naah Lukas Klostermann-a'n a tauh goal a, halftime-ah 1-1 a ni. Nagelsmann hote chak tura rinkai an ni chhunzawm a, amaherawhchu minute 63-naah Marcel Halstenberg-a'n red card a hmu.

Tlem zawk lang nghal loin mualneituin Patrik Schick hmangin minute 68-naah hma an hruai a, point thum an hnaih sawt. Amaherawhchu player tlem zawka khel an nih avangin Hertha-in beiseina an nei reng a, minute 10 chauh a awm tawh tihin Everton forward hlui Ademola Lookman-a'n Matheus Cunha lakah penalty a chawi. 

Berlin tan Krzysztof Piatek a rawn pen chhuak a, cool takin siphurh sutna goal a khung. Nagelsmann chuan, "Pathianniah Mainz kan hneh a, Hertha erawh Zirtawpni zana an khelh hnuah min hmachhawn leh chauh. Hahdamna hun an nei ṭha a, chu chu a danglamna a ni a, DFL ruahmanna an siam ṭha lo a ni," tiin a lungawi loh thu a sawi.

Hoffenheim-in Christoph Baumgartner goal hnih leh Steven Zuber-a goal hmangin FC Cologne 3-1 in an hneh a, Fortuna Dusseldorf-in Schalke 2-1 in an 

hneh bawk.

Tla thei dinhmuna la ding pahnih Union Berlin leh Mainz 05 te 1-1 in an inhnehtawk a, table mawngphaha awm Paderborn-in Augsburg lakah point khat hlu tak an hlawh chhuak.