Jack Miller-a’n Ducati a zawm dawn

Australian tlangval Jack Miller chuan 2021 season aṭangin Ducati bike a khalh dawn, Italian MotoGP team chuan inremna an neih thu hi Nilaini zan khan an puang.

Troy Bayliss leh Casey Stoner te hnung zuiin Miller hi Australian rider zinga Ducati team zawmtu pathumna a ni a, bike ṭha nen chuan world champion nih pawh a beisei ngam a rinawm.

Kum 25 mi Miller hi tun dinhmunah chuan Pramac Racing tan a tlan mek, season hmasa khan world championship-ah pariatna a ni a, dawhsan (podium) ah vawi nga a lawn phak.

Ducati CEO Claudio Domenicali chuan, “Pramac Racing Team a zawm hnuah Jack hian zawi muangin hma a sawn zel, tunah chuan rider duhawm leh hmabak nei eng berte zingah a inhlangkai tawh. Kan hmuh dan chuan a ṭha ber ni turin theihna a nei,” tiin a sawi.

Kum 2015 khan Miller hian kum 20 mi chauh niin MotoGP a luhchilh, Ducati nena inthlunzawm Pramac a zawm. Tunah erawh team hlun leh bike nei ṭha berte zinga mi Ducati a zawm tawh dawn a, a suangtuahna leh duhthusam tih hlawhtlin theihna hun a nei dawn tih a ni.