Apuia captain-na hnuaiah Highlander-in Chennaiyin an inhnehtawkpui

Lalengmawia'n (Apuia) NorthEast United tan captain armband a hreng a, mahse, Mizo rawlthar kaihhruaina hnuaiah High-lander-in hnehna an chang zo lo - Chennaiyin nen 0-0 in an inhnehtawk. 

Chennaiyin tan Lallian-zuala Chhangte leh Jerry Lalrinzuala ten inkhel bul an ṭan a, Lianzuala hian goal khungna remchang vawi thum zet nei thei mah se a chhawr thei lo - Jakub Sylvestr tana a siamsak chu Slovakia international hian goal-ah a chantir thei lo bawk. 

NorthEast United tan minute 56-ah Rochharzela chu luhtir ni mah se Aizawl FC midfielder hlui hian goal-a hlawh chhuak thei bik lo a, Lalrempuia Fanai chuan minute 78-naah Apuia a thlak bawk - Chennaiyin lamah Lalchhuanmawia Fanai chu bench lamah hmuh tur a awm leh ta a, Lengpui defender hi hliam damkawr a nih avangin luhtir a ni lo thung. 

Pathianni zan inkhel dangah Bengaluru-in Kerala Blasters lakah si phur hmasa zet mah se inkhel a tawp meuh chuan 4-2 in an chak a, Blasters-in tun season-ah chak an la nei lo chhunzawm zel. 

Blasters tana minute 17-na leka Rahul KP-a goal hmahruai chu Bengaluru hian Cleiton Silva hmangin an chhanglet a, captain Sunil Chhetri chuan an penalty hlawh chhuah chu 'panenka' hmangin a khung thei lo - Aizawl FC keeper hlui Albino Gomes chuan a lo dang. 

Mahse, Bengaluru-in second half-ah Erik Paartalu leh Dimas Delgado goal rang tak hmangin goal hnih an rawn khung a, Jordan Murray chuan Blasters tan khung ve leh mah se Chhetri chuan a tihsual thup nana rawn tauh lutin Blasters chak a rawn nem nghet. 

Blasters tan Lalruat-thara'n inkhel bul a rawn ṭan a, mahse Hmunhmelṭha tlangval tan zan chhinchhiah tlak tia sawi tur a ni lo.