Mizoram cricket season a tawp

Cricket Association of Mizoram (CAM) hnuaiah 2019-20 season chhungin inelna a awm tawh dawn lo. CAM secretary Mamon Majumder chuan Vanglaini zawhna chhangin season an hman chhunzawm a beiseiawm tawh loh thu hi a sawi.

Mamon Majumder chuan, "Covid-19 vangin harsatna nasa tak kan tawk a, tunah ruah tui a tlak leh tawh bawk avangin dinhmun harsa takah kan ding, tun season atan chuan tournament khelh hmabak ho kan nei thei tawh lo ang," a ti.

Season tihtawp chungchangah CAM chuan thuchhuah an la siam chiah lo. CAM Apex Council lamin thutlukna an la siam leh ang, hri leng leh ruah sur vangin tournament khelh chhunzawm erawh a beiseiawm tawh lo.

CAM season kal laiah Mahuma Memorial I Division Tournament 2020 chu khelh laklawh lai a ni. Kum danga tih ngai loh ang takin DSA Ground, Silchar-ah inelna hi neih a ni a, beiseina pawh a sang hman hle.

Amaherawhchu, coronavirus vangin buaina a thleng. Team pariat inlan ten match hnih ṭheuh bak an khel hman lo, hri leng vang hian inelna neih chhunzawm theih a ni lo. League round khelh chinah Chanmarians leh Chhinga Veng te chuan point li ve ve hmuin table chungah an awm.

Mamon-a chuan, "Silchar-ah inkhelh theih a ni tawh lo. Suaka Cricket Stadium chu chei ṭhat mek a nih avangin a hman theih loh bawk, harsatna belhchhah turin ruah a sur tawh bawk si a, kan inkhel chhunzawm thei tawh lo ang," a ti.

Coronavirus buaina hian khawvel pum a huap a, tualchhung inelna pawh a bang thei bik lo. CAM season kal laia khelh hmabak - Mapuia Cricket League, Inter Branch YMA Cricket Tournament, Inter College leh kum bithliah inelna ho a awm thei dawn ta lo.

Vanglaini zawhna chhangin CAM secretary chuan, "Tournament kan khel thei lo tur hi a pawi, a bik takin Inter Branch YMA hi team an tel tamna tur leh nghawng nei lian tur a ni a, player naupang zawk inchherna tur kum bithliah inelna neih theih loh tur pawh a uiawm.

"I Division club pariat kal zen dan tur pawh ruahmanna a awm, kuminah match an khelh tlem avangin tlahniam an awm lo ang. Season tharah team pariat ni ṭhin chu team 10 an ni ang a, nakkum tawpah erawh team pali an tla hniam thung ang," a ti.