Lungleiah cricket inelna buatsaih

Lunglei District Cricket Association chuan Cricket Association of Mizoram (CAM) hnuaia Associate Member a hlankai an nih lawmna atan Thuamluaia Mualah tournament a buatsaih.

Tournament buatsaih tur hian Thuamluaia Mual hman theih hun, hun awl remchang lain nikhatah match pathum khelin inelna hi neih a ni.

Tournament-ah hian team paruk - Lunglei Warriors, Serkawn, Lunglawn, Venglai, Chanmari leh Zotlang Blazing Bulls te an tel.

LDCA President Pu Lalrotluanga (Pu Marova) chuan kumthar atangin tournament chu tun aia tam zawka buatsaih an tum thu a sawi a, chu bakah chuan Night Cricket ang pawhin hmalak a nih tur thu a sawi bawk. Registration leh Club Management/Administration pawh tun aia an kal uluk tur thu a sawi bawk.

Lunglei DCA hian Associate Member an nih hma pawhin mumal takin tournament hi district huapin season tin an buatsaih thin bawk. Kum 2023 chhungin tournament tum thum buatsaih tawh niin, nakkum January thlaah hian LDCA hian President's Cup huap zau zawkin an buatsaih dawn bawk a ni.