Winter Olympic Games 2022 IOA Preparation Committee-ah Mizo pa

Indian Olympic Association (IOA) chuan May 27, Nilaini khan thuchhuah an siam a, Mizoram Olympic Association (MOA) secretary general C. Laltlanthanga chu IOA Preparation Committee for Winter Olympic Games Beijing 2022 member atan an ruat.

Mizoram State Sports Council (MSSC) secretary Tlana hi Mizo zinga hetiang din­hmun luah thei kan neih hmasa ber a ni a; IOA Associate Executive member leh IOA North East Olympic Committee member a nih bakah North East Olympic Association vice president ni lai a ni bawk.

Republic Veng pa C. Laltlanthanga chuan, "Mizote zing­ah player leh coach ṭha tak tak an awm a, tun aia sang thleng tur chuan thuneitu lamah Mizo an awm a ngai. Sports lama officer-te, Mizoram State Sports Association-a hruaitute pawh National Sports Federation-ah tel phak a ṭul."

"Kan infiammite chungah beiseina sang tak kan nei a, thuneitute lam pawhin tih tur kan nei tih kan hriat a ṭha. India ram hruaituah Mizo kan awm thei a nih chuan infiammite an huaisen sawt dawn," tiin Vanglaini a hrilh a, player-te sang taka thleng tur chuan Sports Administrator leh Association hruaituten hma an hruai a ngaih thu a sawi.

2022 Winter Olympics hi Beijing, China-ah February 4-20, 2022-ah neih tur a ni a, Mizo pa C. Laltlanthanga telna committee hian India aiawh tur an thlang ang.