Champion turin hmasawn a ngai - Arteta

Arsenal manager Mikel Arteta chuan ball chan tam ringawt chu chak nan a tawk lo tih a sawi a, an duh ang ngeia Premier League champion ni tur chuan goal an khung a ngai tih a sawi.

Gunners hian West Ham lakah goal khung tumin vawi 30 ngawt 'shot' an nei a, an khingpui te box chhungah vawi 77 tehmeuh ball an khawih - mahse a tawpah chuan 2-0 in a chak lo.

Season hmasa ang bawkin North London club hian a zawnin Liverpool leh West Ham lakah point an hloh a, an nomawi beiseina pawh a thamral leh mai ang tih rinna a lian nghal hle.

Arteta chuan, “Chiaina tur a awm lo, a pawimawh zawk chu tun aia tha leh hriam zawkin engtin nge kan kal theih ang tih hi a ni a, tun ang aia tha a khelh dan kha kan hriat a ngai.

“Khingpuite box chhungah ball chang tamin inkhel thunun mah ila, goal kan khung si loh chuan league champion kan ni thei lo ang, a chhan chu West Ham laka kan result ang kha a ni thei tlat.

“Chutihrualin, goal khung bak a dang kha kan ti tha hle a, kan mamawh ang kan tih belh zeuh thei a nih chuan a tha khawp ang,” a ti.

Arsenal hian kumina an match hnuhnung ber atan December 31, Pathianni zan dar 7:30 hian Fulham an lenchilh ang.