Man United hmaah La Liga hmahruaitu

Nizan khan UEFA hmunpui Nyon, Switzerland-ah Europa League draw neih a ni a, team 32 zing aṭangin a langsar pahnih Manchester United leh Real Sociedad an inhmachhawn dawn. Last 32 hi February 2020-ah khelh a ni ang.

Ole Gunnar Solskjaer hote hian Champions League khelin season bul an ṭan a, hun rei zawk pakhatna dinhmun an luah hnuah an match hnuhnung berah RB Leipzig an hneh loh avangin Europa League an khel chhunzawm dawn. 

Man United an vanduai a, La Liga hmahruai mektu  Real Sociedad nen pawhfuh an ni. Spanish club hi Man City legend David Silva khelhna a ni a, English club nena an inkhel tur hi a ngaihnawm ang. 

Premier League-a che chhia Arsenal-in group match-ah an khingpui hneh vek mah se team ṭha Benfica nen pawhfuh an ni a, Mikel Arteta hote hi an vanduai a kaltluang a ni.

Tottenham erawh an vannei a, Austrian club Wolfsberger  nen pawhfuh an ni. English club dang Leicester City-in Slavia Prague  an hmachhawn ang.

Liverpool legend Steven Gerrard hoa indinthar mek Rangers-in Royal Antwerp an hmachhawn dawn a, Scottish Premiership hmahruaitu hian stage sang zawk thlen an inbeisei ang.