Jeremy Lalrinnunga'n gold medal la

Senior National Weightlifting Championship-ah, Jeremy Lalrinnunga chuan Mizoram tan kg67 huangah gold medal a la.

IWLF National Senior, Junior leh Youth Weightlifting Championship chu Itanagar, Arunachal Pradesh-ah neih mek niin, Jeremy-a hian snatch 136kg, Clean & Jerk 162kg, a total-ah 298kg chawiin pakhatna a ni.

Hliam vangin Jeremy-a hi hun rei tak a chawl a, tunah hian Asian Games atana enchhinna neih hmabak a ni. India camp zawm leh tur niin, ram pawn lama inelna hmachhawn thei turin a inpeih leh ta hle.

Mizo tlangval tho Lalhunthara chuan Services hmingin a chawi a, chawiin - Snatch 121kg, Clean & Jerk 163kg, total-ah 284kg niin bronze medal a la.

Jeremy leh Hunthara inkarah hian silver medal laltu Neelam Raju-a a awm. Ani hian Snatch 126kg, Clean & Jerk 162kg, total-ah 288kg a chawi thung.