Tyson vs Holyfield thleng rawh se - Fury

British boxer rothap Tyson Fury chuan tun hnaia Mike Tyson leh Evander Holyfield-ten inhnek an tum leh chu a thlawp thu a sawi a, "An hriselna dinhmun a ngaihtuahawm lo a nih phawt chuan an tih duh chu ti ngei rawh se," a ti. 

'Iron Mike' a hming chawia Tyson tih hming an pek Fury chuan, "Exhibition fight-a Mike Tyson ka hmachhawn duh leh duh loh mi an zawt a, 'Duh tehreng mai,' tiin ka chhang. Mahse, hei erawh thil thleng tur niin ka hre lo. Tyson leh Holyfield hi inhnek ngei se ka duh a, an châk zawng chu an ti mai tur a ni," tiin a sawi. 

Mike Tyson hian tun hnaiah ring chhunga a kir leh tur thu sawiin mi dang ṭanpui nana a inhnek tur thu a sawi a, Holyfield pawhin tun hnaiah ring lama kir leh a tum thu a sawi ve bawk - boxer pahnihin fight an hmachhawn leh tur chhan hi midang ṭanpui nan a ni. 

World heavyweight champion hlui Wladimir Klitschko chuan tun hnaiah Holyfield-a training lai hi tlawhin social media lamah a fak zui a, "A pawimawh ber chu tumna hi a ni a, taksa bakah rilru paukhauh a ngai. Kumte chu number mai mai alawm," a ti. 

Boxing khawvela world heavyweight champion vawi li ni thei awmchhun Holyfield hi kum 57 mi a ni tawh a, world heavyweight champion naupang ber record kum 20 mi nichunga lo siam tawh Tyson hi kum 53 mi a ni thung. 

Vawi hnih ngawt Tyson lo hneh tawhtu Holyfield hian Tyson hmachhawn a duh thu ual au takin a lo sawi tawh a, boxer pahnih hi lo inhmachhawn ta pawh ni se a tam berah round li bak erawh an inhnek kher lo ang.