Hello 2024 - a chung berah Liverpool

Liverpool-in December 23 zanah Arsenal chu 1-1 in an inhnehtawkpui a, Anfield-a Reds an chak zawh loh avangin Arsenal-in Premier League table chung bera awm chungin Krismas an hmang a, ruai ṭheh niah Liverpool-in 2-0 in Burnley hneh zui mah se an lawm a kim thei lo.

Mahse, thlasik khawvawtin Arsenal a hmet zawi a, Liverpool laka point an hlawhchhuah hnuah league match hnih khelin an tlawm ve ve. Liverpool erawh kum thar pawh lawm ve hman loin January 1-ah an inlan a, Newcastle United 4-2 a an hneh avangin a chung berah an awm ta.

Liverpool tan AFCON khel tura thang bo mai tur Mohamed Salah chuan Reds fan-te lung tileng zual turin goal hnih a khung a, Curtis Jones leh Cody Gakpo ten goal khat ve ve an khung bawk - Magpies tan Alexander Isak leh Sven Botman ten goal khat ve ve an khung thung a, awmzia erawh a nei ta lo.

Jurgen Klopp-a 'Liverpool' hian match 20-ah point 45 hmuin table chung ber an luah a, tun season league match-ah vawi khat chiah an la tlawm avangin an awmna hi, "An phu ve reng a ni" a tih ngam a, mahse, Aston Villa, Manchester City, Arsenal leh Tottenham Hotspur aia an sanna hi a tam chuang lo tih hriat a ṭha.

A buaithlak phawt!

Anfield-ah Liverpool-in inkhel an thunun a, fi rst half chhung ringawta an shot neih zat hi 18 zet a nih avangin, "An chak ang em?" tih ai chuan, "Engtikah nge goal an khung ang?" tih chu zawhna zawk a ni a, Magpies fan-ten hlauthawngin inkhel an thlir.

Right back chhuanvawr Trent Alexander-Arnold-a'n uiawm takin a chance neih vawi hnih a khung lo a, vawi khat phei chu post a tihper hial - Darwin Nunez pawhin chance a nei a, mahse, Uruguayan striker hi 'a changtupa' aiin 'a ṭhelhtupa' a la ni rih!

Nunez hian a chance neih a chhawr lo a ni mai lo a, Luis Diaz goal khung an pawm loh chhan pawh Benfi ca striker hlui Nunez hi chhetêa a lo off side vang a ni. Liverpool fans ṭhenkhat chu an striker ropui ni tura beisei lakah hian an beidawng ṭan.

First half-ah hian Salah pawh a 'chuti' lua lo. Minute 22-naah penalty hmangin goal khungna remchang nei mah se a chhawr thei lo a, Magpies keeper Martin Dubravka chuan a dansak - Salah hi a penalty pet hnuhnung 10-ah vawi li an dansak a, inenfi ah a ngai.

A hun têah...

Liverpool-in chance tam tak nei chungin goal an khung lo a, a uiawm ṭhin hle. Mahse, second half-ah erawh siamtharna changin goal li ngawt an khung a, a hmahruaitu chu fi rst half-a penalty chhuih lut lotu Salah a ni.

Diaz leh Nunez ball inpek ṭha tak karah ven loha awm Salah chuan a hmawr bawkin hmahruaina goal a khung a, mahse, minute nga hnu lawkah Magpies tan Isak chuan si phurh a sut avangin Anfi eld thawm rin chhung a rei lo.

Goal pahnih inkarah hian Nunez chuan Liverpool tan khung belhna remchang vawi hnih a nei a, a chhawr lo ve ve - Isak-a goal a luh chiah hian Reds fan-ten an ui lehzual. Mahse, Liverpool-in Newcastle neih loh an nei a, a hming chu Salah a ni.

Egyptian forward hian Diogo Jota chu ṭhe zeta ball a pek hnuah, Portuguese forward hian Jones tan a siamsak ve leh a, English midfi elder tan goal ruaka khung turin harsatna a awm tawh lo - Liverpool-in 2-1 in hma an hruai.

A tawp khartu

Salah a phur laklawh - minute li hnu lawkah Gakpo tana khung turin ṭha takin a siamsak leh a, 3-1 a ni. Botman chuan corner aṭanga ball kal tauh lutin, Magpies tan beiseina siamsak ve leh mah se, hun tawp nan minute li chiah a awm tawh tihah Jota chuan penalty a hlawh chhuak a, Salah-a'n a hlah nawn tawh lo.

Liverpool forward hian Merseyside club tan hian Premier League-ah goal 151 zet a khung ta a, PL-a club pakhat tana goal 150 khung tling thei player pangana a ni - ropuina ram a pan zel.

Salah hma hian Tottenham Hotspur goal khung khawl ni ṭhin Harry Kane (213 goals), Manchester City legend Sergio Agüero (184), Manchester Unites chhuanvawr Wayne Rooney (183) leh Arsenal fante atchilh rawn  ierry Henry (175) te chuan club pakhat tan league-ah goal 150 chuang an lo khung tawh.

Kum 31 mi Salah hmaa record lo nei tawhte hi striker vek an ni a, winger Salah-a record hi a ropui hle - tun season inelna hrang hrangah match 27 khela goal 18 khungin, assist vawi kua a nei leh der tawh - mahse, January 13-a khelh ṭan tur AFCON khel turin Salah hi a feh chhuak zui ang