Kum thar lawm nan a chung berah Real Madrid

Fur khua leh ruah tui pawh kawp tura duan an ni a, La Liga table chung ber leh Real Madrid pawh kawp tura duan ang mai an ni - Krismas leh Kumthar chawlh hman zawha an match hmasa berah Real-in hnehna an chang nghal a, Real Mallorca chu 1-0 in an hneh.

Real tan Antonio Rudiger chuan inkhela goal awmchhun a khung a, Mallorca-in a chhanletna tur an neih loh avangin Real tan goal khat hi chak nan a tawk - Real hian league match 19 an khelh aṭangin point 48 an nei tawh.

Carlo Ancelotti naute hi hahdam taka awm thei erawh an ni lo - Girona chuan season duhawm an hman chhunzawm zelin, Atletico Madrid chu 4-3 in an hneh a, Real nen an point hmuh zat inangin, table-ah pahnihna an ni mek.

Atletico tan Alvaro Morata chuan hattrick siam mah se, Girona lamin Valery Fernandez, Savio, Daley Blind leh Ivan Martin hmanga goal an khung avangin, 4-3 in an chak a, mumang ramah an chen chhunzawm zel.

Kir lehna

Real tan November international break-a a inhliam hnuah Vinicius Jr a lo kir leh ta a, mahse, Brazilian forward hian a lo kir zanah goal a khung thei lo - vawi hnih ngawt chance a nei a, mahse, Mallorca keeper Predrag Rajkovic chuan a dansak ve ve.

Mallorca hi an vanneih zan ni se, chak thei dinhmunah an ding hial. Mahse, Antonio Sanchez chuan crossbar a pet per a, Samu Costa chuan post a tihper bawk.

Real tan goal khung ṭhang Jude Bellingham lansarh zan a ni lo a, tun season-a goal 13 khunga league top scorer ni mek hian Mallorca lakah chance a nei a, mahse, Rajkovic chuan harsatna nei loin a dang.

Madrid khaw club tan Brahim Diaz-a'n goal khung theihna remchang a nei a, mahse, Rodrygo shot per lehlam chu goal ruakah a tauh lut lo - Real mualpho zan a ni dawn em ni, tih chu rilruah zawhna a awm hman.

A tawpah Rudiger

Hun tawp nan minute 12 chiah a awm tawh a, Real an vannei ta nge nge - Rudiger chuan Luka Modric corner pet ṭha zet aṭanga ball kal chu a tauh lut a, Santiago Bernabeu thawm chu ring tak a ni.

Real-in Rudiger-a goal khung an chakpui zui - German defender hian September 11, 2022 khan La Liga-ah Real tan goal a khung a, Mallorca lakah tho a ni - khami hnua league-a goal a khung leh hmasak ber a khung a, Mallorca lakah tho a ni bawk.

Mallorca laka Real chak hi coach Ancelotti-a'n contract thar a ziah hnua a match hmasa ber a ni a, a lawmawm dan a danglam bik ang. Italian coach hian tun season-ah a contract neih lai a hmang zo tawh dawn a, hei vang hian season tawp rualin Brazil a enkawl dawn nia sawi a ni.

Mahse, December thla tawpah khan June 2026 thleng Real enkawl chhunzawm turin contract thar a ziak a, kum 64 mi coach hian Real hi a vawi hnih enkawlna niin, Champions League (2), La Liga (1), Copa del Rey (2), Club World Cup (2), European Super Cup (2) leh Spanish Super Cup (1) ah te champion nomawi a chawipui tawh.

A thlawn mai maw

Atletico Madrid-in an hmelma Real lawmna an siam thei lo a, Girona an ngam lo. Atletico tan Morata chuan hattrick siam mah se a thlawn mai an chang zo a, mikhualna ramah team ṭha lo zawka ngaih Girona an ngam lo.

Girona hian Valery, Savio leh Daley Blind goal hmangin vawi thum ngawt hma an hruai a, mahse, season duhawm tak hmangtu Morata chuan si phurh hi a sut vek.

Mahse, hun pek belhah Girona tan Ivan Martin chuan goal khung lehin, Atletico tan si phurh sutna hun a awm tawh lo a, Girona an chak - La Liga table-a 10-na aia sanga season khar ngai lo Girona-in thilmak thlentir a, champion an beiseina chu an chhi nung zel.

Atletico erawh an tlawm avangin table-ah pathumna an ni a, nizana inkhel Barcelona-in hnehna an chan chuan Diego Simeone-a naute hi palina lamah an chhuk thla leh ang.