Thlasik transfer - tute nge che thei?

European top five league lamin thlasik transfer an hawng leh ta a, che mai thei dinhmuna ding tam tak an awm a, a bik takin Premier League lamin ngaihven a hlawh lehzual.

Transfer langsarah chuan Donny van de Beek-a'n Manchester United chhuahsanin, Eintracht Frankfurt chu season tawp thleng atan loan-in a zawm a, September 2020-a pound maktaduai 35-a United zawmtu hi German club hian season tawpah an duh chuan a nghetin an la zui thei ang.

Kalvin Phillips (Manchester City)

England international hian season hmasa khan City hi zawm ve chauh mah se, a beisei angin khelhna hmun a chang lo a, tun season-ah match 10 chiah a la khel - Newcastle United chuan lakluh tumin uluk takin an veh mek a, Juventus lam pawhin an thlithlai nia sawi a ni.

Jadon Sancho (Manchester United)

July 2021-a £73mtd-a United zawmtu Sancho leh Erik ten Hag an inhmu thiam lo a, first team zingah pawh training a nei lo. Kum 23 mi forward hi a club hlui Borussia Dortmund lamah loan-a kal tur anga sawi a ni mek.

Aaron Ramsdale (Arsenal)

Season hmasaa Arsenal-in league nomawi an beisei ngam chhan langsar chu Aaron Ramsdale a ni. England number 1 pawh ni zui mai tura ngaih a nih laiin Arsenal-in David Raya an neih hnuah Ramsdale-a'n bench lamah hun a hmang tam a, Euro 2024-ah Three Lions tana fehchhuah ve a duh a nih chuan amah rimtu Chelsea emaw Newcastle emaw, hmun pawimawh a chan theihna tur zawk zawk a pan a ṭul ang.

Conor Gallagher (Chelsea)

Chelsea-ah Gallagher-a'n hmun pawimawh a chang a, mahse, fans tam takin an ngaina lo. Hetiang boruak karah Chelsea hian tun hnai thla 18 chhunga sum an hman nat avangin dan bawhchhe lo tura inhralh ṭhen an mamawh a, £50mtd an chhiar English midfielder hi Spurs pan thei dinhmunah a ding mek.

Ivan Toney (Brentford)

Football Association dan bawhchhia a, sum inthapna lama a lo inhnamhnawih avangin Premier League striker 'hot' ber pawl Toney chuan thla riat hrem a nihna a tuar mek a, January 17 hian a hremna a hmang zo dawn. Striker mamawh Arsenal chuan season hmasaa Brentford tana goal 21 khung thei striker hi an ngaihven hle.

Joao Palhinha (Fulham)

September khan Palhinha hian Craven Cottage-ah contract thar a ziak a, mahse, amah duhtute hi Arsenal, Bayern Munich leh Liverpool an nih avangin Fulham hian £60mtd a dawrtu an neih chuan chelh an harsat ang.

Thomas Partey (Arsenal)

Kum 30 mi hi thla hnih zet hliam vangin a inkhel tawh lo a, Mikel Arteta chuan player thar leina tur sum tuak nan hralh a pawi ti lo nia sawi a ni a, Juventus nen an sawizawm mek.

Trevoh Chalobah (Chelsea)

Pre-season-a a hliam vangin Chalobah hi Blues tan tun season-ah a la inlan lo a, inhralh ṭhen mamawh Chelsea chuan hralh tur zingah an telh nia sawi a ni a, Crystal Palace, Bayern leh AS Roma ten an duh niin an sawi.

Emile Smith Rowe (Arsenal)

English attacking midfielder hi tun hnaiah hliam vangin a buai a, Arsenal-ah hmun pawimawh a chang phak lo. Aston Villa-in an duh nia sawi a ni a, Arsenal hian Villa player pawimawh Douglas Luiz an duh ve bawk avangin Luiz-a mana kal tel thei anga sawi a ni.

Raphael Varane (Manchester United)

Kum 30 mi defender hian a beisei angin Old Trafford-ah ropuina leh chawimawina a khum lo a, nipuiah a contract a zawh tawh dawn bawk avangin United chuan January-a hralh mai an pawi ti lo nia sawi a ni. A club hlui Real Madrid-a kir tur angin an sawi a, Bayern Munich hming a ri bawk.