Premier League-ah tu nge champion dawn?

Premier League-a club 20-ten tun season-a an khelh tur zat chanve an khel tling tawh a, hmahruaitu chu Liverpool an ni. Jurgen Klopp-a hote hian match 20 an khelh aṭangin point 45 hmuin hmahruaitu an ni a, anmahni hnaih bertu Aston Villa aiin point thumin an hmu sang zawk.

Reds hian 2019–20 season hnuah champion theihna hun ṭha an nei a, season chanve thlir chuan champion thei an ni tih chu a chiang. Amaherawhchu March-April thla chhoah fiahna tak tak a inṭan dawn a, chutihrualin AFCON leh Asian Cup avangin Reds tan fiahna a inṭanah a ngaih theih bawk.

Fiahna hautak

Liverpool hian Krismas hmain Arsenal an mikhual a, 1-1 in an inhnehtawk. Hei vang hian Krismas laiin pakhatna dinhmun hauh theihna hun ṭha an bawhpelh. Mahse, Reds hian Boxing Day-ah Burnley 2-0 in an hneh a, kum thara an match hmasa berah Newcastle United 4-2 in an hneh leh bawk.

Reds hian match hnuhnung pathumah point sarih an hmu a, Mohammed Salah-a'n goal thum a khung. Egypt captain hi AFCON khel tura a zin dawn avangin Salah tel loin an khelh a ṭul dawn. Inkhel pathumah hian Wataru Endo-a'n bul a ṭan vek a, Japanese midfielder hian hmun pawimawh a chang chho. Kum 30 mi Endo hi Japan-in an koh avangin Asian Cup khel turin a zin dawn bawk.

Salah leh Endo awm loh laia Liverpool hmachhawn theih chu Bournemouth, Chelsea, Arsenal leh Burnley te an ni a; a bik takin London club pahnih Blues leh Gunners te hi a hautak dawn. Klopp leh a hoten Premier League nomawi chawi dan a hre tawh a, Salah leh Endo te rawn let thlenga hmahruaitu an ni thei a nih chuan champion rinkai ber an ni thei hial ang.

Champion lai nge nge

Manchester City-in FIFA Club World Cup an khelh avangin match khatin an khel tlem a, Pep Guardiola hote hian an khelh hmabakah chak ta se Liverpool hi point hnih chauhin an pha dawn lo. Hei bakah club pahnih hi an la inhmachhawn dawn avangin an kutah engkim a la awm tih hriat a ṭha.

Premier League champion lai Man City-in AFCON leh Asian Cup-ah player pakhatmah an chan ve dawn lo a, an thiampuipa Kevin de Bruyne pawh Sheffield United an hmachhawn ṭumin squad-ah a awm leh tawh bawk.

Hei chauh hi a ni lo, goal khung khawl Erling Haaland-a tel loin City hian FIFA Club World Cup an chawi thei a; Premier League-ah pawh Norwegian striker tel loin match zawnin an chak.

City hian League Cup-ah beisei tur an nei tawh lo a, chutihrualin Premier League, FA Cup leh Champions League-ah nomawi humhim turin an dinhmun a la ṭha vek. Pep-a hian squad ṭha tak a neih avangin City hi dah bo a la thiang lo.

Fiah dawl lo Arsenal?

Arsenal hian season liam ta khan champion theihna hun ṭha an bawhpelh a, kuminah pound maktaduai 200 dawna squad thuam ṭhain champion tumin si ruk lain an thawk chhuak. An vanduaina erawh pound maktaduai 34 chuang an senna Jurrien Timber chu inhliam vangin Premier League match khatah chauh a inlan.

Mahse, Timber awm lo chung hian Arsenal hi a che ṭha tho. English midfielder Rice-a'n midfield a uap lum ṭha a, goal thum a khungsak tawh. Season liam taa an player pawimawh Bukayo Saka leh Martin Odegaard te an la che ṭha reng bawk.

December 25-ah khan Arsenal-in match 18 aṭangin point 40 an hmu a, Premier League hmahruatu an ni. Amaherawhchu, Gunners hian Krismas leh Kum thar inkarah West Ham leh Fulham an hmachhawn a, an hneh lo ve ve. Krismas hnuah Mikel Arteta hoten point an hmuh belh loh avangin table-ah palinaah an awm mek.

Arsenal hian hmahruaitu Liverpool hi point ngain an pha lo a, an hnuai chiaha awm Tottenham Hotspur aiin point khat chauhin an hmu tam. Gunners hi champion thei dinhmuna a din laiin Champions League khel lo thei dinhmunah an ding bawk.

Season liam ta kha chuan Gunners hian match 20-ah point 50 an hmu a, tun season-ah khelh zat inangah point 10-in an hmu tlem zawk. Nikuma season tawp lam boruak sang dawl zo lo Gunners kha season laihawlah an chesual tawh a, champion an tum a nih chuan insiamṭhat rang a ṭul ang.

Club dang hi...

Aston Villa hi table-ah dinhmun ṭha viau mah se champion tur chuan an ṭha tawk loah a ngaih theih. Unai Emery hote tan season thara Champions League khelh phak pawh a harsa dawn.

Tottenham Hotspur-in Harry Kane hoin nomawi an chawi thei lo a, England captain awm loh hnuah pawh nomawi an chawi mai chu a la rinawm loh. Harsatna belhchhah turin player pawimawh Son Heung-min bakah Yves Bissouma leh Pape Matar Sarr te Asian Cup leh AFCON vangin an chhawr thei dawn lo.

Newcastle United tan pawh nomawi beiseina a tawpah a ngaih theih tawh a, UCL an khelh nawn pawh a rinawm ta lo zawk. Manchester United-in season chhe tak an hmang a, chutihrualin club dang an chet ṭhat bik loh avangin UCL khelhna kawng a la inhawng. Erik Ten Hag-a hote tan Europe inelna sang bera khel turin January transfer hman ṭhat emaw player neih sa dam ṭhat emaw a pawimawh ang.

Chelsea a zawnin vawi hnih an chak a, 10-naah an la awm zel. Blues tan nomawi beisei ngam chi a ni tawh lo a, chutihrualin Mauricio Pochettino enkawl an nih bakah sum hmang tam club an nih miau avangin UCL khelh theihna kawngte chu a la awm mahna!

AFCON & Asian Cup: Premier League player zingah tuten nge khel dawn?

Kumin January thlaah Africa Cup of Nations leh Asian Cup khelh a ni dawn a, Premier League player ṭhahnem tak an tel dawn. Club ṭhenkhat chuan AFCON leh Asian Cup awm hi an tuar ngei dawn niin a lang.

AFCON hi January 13 leh February 11, 2024 chhung hian Ivory Coast-ah khelh a ni dawn a, Asian Cup hi January 12 leh February 10, 2024 chhung hian khelh a ni dawn thung.

FIFA danah ramin player a ko a nih chuan club-in player chelh theihna a nei lo a, Liverpool pawhin an club top scorer leh Egypt captain Mohamed Salah an chan dawn.

Liverpool manager Jurgen Klopp chuan, "Africa Cup of Nations awm tur thu hi kan hria a, Mo pawh a kal a ngai dawn. Chutiang bawkin Endo pawh a kal a ngai ang. Kan insiamrem ve mai a ṭul dawn a ni," tiin a sawi.