Kum thar lawm nan PSG an champion

Paris Saint-Germain chuan kum 2024 bul an ṭan fuh hle, kumina an match hmasa ber atan Toulouse chu 2-0 a hnehin Champions Trophy an la. Inelna hi Ligue 1 champion leh French Cup champion ten an khelh ṭhin a ni.

Nilaini zan Parc des Princes-a inkhelah Paris club tan Lee Kang-in leh Kylian Mbappe ten goal khat ve ve an khung, mikhual lamin a chhan letna an nei lo. Tun hnai kum 11 chhunga a vawi 10 nan PSG an hlawhtling ta chiah.

Goal hnih

Luis Enrique nauten bul an ṭan fuh hle, minute thumna lekah Lee Kang-in rawn inlarin Ousmane Dembele siamsak chu hnai takah a lo khung nghal. Lee hi South Korea tan Asian Cup khel zui tur niin, season kal laia goal thum a khungna a ni.

French Cup champion Toulouse lamin na takin an bei let nghal. Thijs Dallinga-a shot chu PSG goalkeeper Gianluigi Donnarumma chuan lo dang pialin goal ban a per hlauh, a luh lohna chu tlemte chauh a ni hial.

Chawlhlawk hmaa goal neitu erawh PSG bawk an ni. Tun season tawp ruala contract zo mai tur Mbappe chuan amah vengtu paltlangin goal kilah mawi takin a khung zui a, minute 45 an khelh tlin chuan chak tur zawk a chiang tawh.

Second half-ah Achraf Hakimi chuan free kick aṭangin goal ban a pet per a, hun tawp thlengin goal dang a lut zui lo. Inkhelh bana football titi chu PSG nomawi bakah an player pawimawh Mbappe awmzel dan tur a ni.

Enrique a lawm

Tun hmain Luis Enrique-a'n hlawhtling takin Barcelona a lo enkawl tawh, a hnuah an ram Spain a enkawl leh bawk - Catalan club a enkawl hnua a vawi khat nan nomawi a chawi leh ta a, a naute khelh danah a lungawi hle.

PSG manager Enrique chuan, "A tir lam minute 45 kha kan khel ṭha takzet. PSG ka enkawl chinah chuan first hlaf kan khelh ṭhat ber ṭum a ni hial ang, sawisel tur awm lo khawpa ṭhain player zawng zawng khan an khel.

"Final boruak hi chu a danglam ṭhin, team pahnih inkhelah minute 90 chhunga ti ṭha zawk nih a ngai. Second half-ah Toulouse kha an rawn khel ṭha ve deuh a, mahse chumi kan lo dang leh thei kha a lawmawm," a ti.

Champions Trophy an khelh theih chhan hi Ligue 1 champion an nih vang a ni a, season hmasa lama league nomawi chawi puitu Christophe Galtier-a hna thawh rah a ni. Enrique chuan Galtier sulhnu an chhui thei chu lawmawm a tih thu a sawi bawk.

Mbappe hma hun

Kylian Mabppe hi kum 25 mi a ni a, football khawvelah hmabak tam tak a la nei. PSG tana a contract neih lai hi tun season tawp rualin a zo dawn, nipui bazar ti ngaihnawmtu zinga mi a ni leh ngei dawn tih a chiang - a hma hun tur an inrinsiak leh mek ta.

France international hian PSG tan inelna hrang hrangah match 283 aṭangin goal 234 a khung tawh, ani aia khung tam an awm lo - amah hnaih bertu Edinson Cavani chuan goal 200 a khung, an inkar a zau ta hle. Goal khung thei bik hi European club lian dangte pawhin lakluh an duh.

Mbappe chuan, "Ka hma hun tur atang engmah thutlukna ka la siam lo. Club chhungah hian ka hma hun tur sawi a awm ngai lo, thutlukna ka siam chuan thil a ti danglam teh chiam lo ang, tunah chuan PSG tana theihtawp chhuah hi ka tih tur a ni," a ti.

PSG tan Mbappe-a'n Ligue 1 nomawi ringawt pawh vawi nga a chawi tawh a, hlawhtlinna tam tak a chang tawh bawk. Mahse, Champions League-ah ber a la hlawhtling lo, mimal chawimawina sang dawng turin tun aia club ropui zawka khelh a mamawh niin a lang.