Roma leh Milan an tlang

Romelu Lukaku leh Paulo Dybala te goal khung hmangin AS Roma chuan Cremonese 2-1 in an hneh a, nikuma an ngam loh laka phuba an lak tak avang hian Coppa Italia quarterfinal an lut.

Season hmasa khan Roma hian Coppa Italia quarterfinal-ah Cremonese hi an ngam lo, kuminah pawh thil mak a thleng leh teuh hle. Serie B team hian Frank Tsadjout hmangin hma an hruai hmasa, chawlhlawk laiin si khat faiin hma an hruai.

Mahse, second half-ah team ṭha danglamna a lang. Striker palian Lukaku-a'n si phurh a sut bakah hun tawp dawnah Dybala chuan penalty aṭangin chakna goal a khung a, harsa takin Jose Mourinho naute an tlang hram.

Roma coach Mourinho chuan, "Cremonese khelmualah si khat faiin tlawm ila, mi tam takin min demin min sawisel ngei ang, mahse chung mite chuan a hmunah inkhel an en lo tih a ni ang. A chhan chu Cremonese hi team ṭha leh hmachhawn harsa tak an ni tlat.

"Coach ka nih chhung hian team tam tak ka hmachhawn tawh a, hnehna pawh ka lo chang tawh. Mak ka tih em em chu Cremonese ho mizia hi a ni, hetiang taka zahna leh khingpui chawimawi thiamna hi ka la tawng ngai lo, anmahni ṭantute khan ka rilru an hneh takzet," a ti.

Portuguese manager hi Brazil enkawl tur angin tun naiah thawm a thang mek a, mahse Mourinho chuan thuthang satliah a ni tih a sawi. Chanchinbumiten ama chanchin an sawi chu media kaltlanga a hriat ve chauh thu a sawi bawk.

Coppa Italia last 16 inkhel dangah AC Milan chuan Cagliari 4-1 a hnehin quarterfinal an lut ve bawk. Milan hian semifinal lut tur chuan Atalanta an paltlang leh a ngai dawn, anni hian Sassuolo chu 3-1 a hnehin last 16 an lo paltlang ve bawk a ni.

Season an hman ṭhat loh avangin Milan coach Stefano Pioli dinhmun a derthawng a, a bik takin Champions League group stage an paltlang loh avangin sawisel a hlawh. Serie A lamah beisei an phak lo bawk, an tan chuan Coppa Italia hi nomawi chawi theih hnaivai a ni.

Cagliari lakah Milan hian player ṭha ṭhenkhat hliam vanga an chhawr theih loh bakah hahchawlh tir an awm bawk, rawlthar rual pali ngawtin bul an ṭan. Mahse, kum 1997 aṭang khan San Siro-ah chuan Cagliari hi an la hneh lo ngai lo.

Luka Jovic hmangin goal hmahruai an nei a, Serbia international striker hian chawlhlawk hmain goal a khung belh bakah Chaka Traore leh Rafael Leao ten neih belhin, hun tawn dawna Paulo Azzi-a goal khat chu mikhual mualpho hliahna mai a ni.

Rossoneri (Milan sawina) hian Italian Cup hi vawi nga an chawi tawh, sulhnu an nei chhe lo. Amaherawhchu an champion hnuhnung ber chu kum 2003 daih tawh kha niin, kum 2018 hnuah final an la lut leh lo - kuminah nomawi chawi an tum ang.