Hamilton ringtu Button

Formula 1 champion pawh lo ni tawh Jenson Button chuan Lewis Hamilton a la ringtawk hle a, world champion vawi sarih ni tawh hi engtik niah emaw chuan a la tho chhuak leh ngeia a rin thu a sawi chhuak.

Mercedes driver Hamilton hi world title neih tam lamah Michael Schumacher nen an intluk mek, record thar siam mai tura a lan laiin Red Bull driver Max Verstappen a ngam lo hle, season hnuhnung pahnihah Hamilton hian chak ni hmel a hmu miah lo.

Nikum bikah phei kha chuan Max-a hian intlansiak 22 awm zinga 19 tehmeuhah hnehna a chang, season tharah pawh Dutch tlangval hi chak tura rinkai leh a ni dawn - Britain tlangval Hamilton tan chona hautak tak a ni ang.

Button chuan, "Red Bull hian car an nei ṭha, rinkai ber pawh an ni leh dawn. Max hi vanglai hmang mek a ni a, midang tan elpui hautak bik pawh a ni leh ngei ang. Chutihrualin Hamilton tan pawh kawng a inhawngah ka ngai, tun hma lama a theihna sang tak ang kha kan hmuh leh ngei ka ring," a ti.